“OAVga to‘sqinlik qilganlik uchun javobgarlikni kuchaytirish bo‘yicha ishlar boshlangan” - Asadov

O‘zbekiston prezidentining matbuot kotibi Sherzod Asadov bugun, 4 may kuni jurnalistika sohasida “Oltin qalam” mukofotini topshirish marosimidagi nutqida jurnalistlarga bosim o‘tkazganlik uchun javobgarlik kuchaytirilishini eslatib o‘tdi.

“Amaldagi qonunchilikda davlat organlari va tashkilotlarining mansabdor shaxslari tomonidan OAV faoliyatiga to‘sqinlik qilish, senzura o‘rnatish, tahririyat xodimlariga bosim va tazyiq o‘tkazish kabi harakatlar sodir etilgani bo‘yicha javobgarlikni kuchaytirish bo‘yicha bugun kerakli ishlar boshlangan”, – dedi Asadov.

“Shubhasiz, qayerda milliy matbuot erkin va kuchli bo‘lsa, o‘sha mamlakatda xalqchil islohotlar ham bardavom bo‘ladi. Kuchli matbuotni esa o‘z faoliyatida xolislik, adolat va haqiqat mezonlariga amal qiluvchi professional jurnalistlar yaratishiga ishonchim komil”, – deya ta’kidladi prezident matbuot xizmati rahbari.

Kun.uz avvalroq yozganidek, OAV xodimlari faoliyatiga qarshilik uchun jazo belgilash masalasi qator voqealar fonida bot-bot ko‘tarilayotgan bo‘lsa-da, ijobiy hal bo‘lmayapti. Natijada ularga to‘sqinlik qilish holatlari davom etmoqda.

2019 yildayoq jurnalistik faoliyatga to‘sqinlik qilganlik uchun javobgarlik kiritish bo‘yicha qonun loyihasi muhokamaga qo‘yilgan edi. 2020 yilda javobgarlikni joriy etishni nazarda tutuvchi yana bir qonun loyihasi e’lon qilindi.

2021 yil boshida yana bir loyiha – yangi tahrirdagi Jinoyat kodeksi loyihasi e’lon qilindi. Unda ham jurnalist faoliyatiga to‘sqinlik qilganlik uchun javobgarlik joriy etish ko‘zda tutilgan. Biroq hozirga qadar yuqoridagi loyihalarning hech biri qabul qilinmadi.

Jurnalistlarning davlat va xo‘jalik boshqaruvi organlari ustidan parlamentga murojaat etish huquqini qonuniylashtirish masalasi ham qanday ochilgan bo‘lsa, shunday ochiqligicha qoldi.

2020 yili parlamentda ko‘rilgan masala – OAVga ma’lumot bermaslik yoki noto‘g‘ri ma’lumot berganlik uchun javobgarlik belgilash ham qog‘ozda qolib ketgan edi.

2021 yilgi Davlat dasturiga binoan, so‘z erkinligini ta’minlash va OAVni har tomonlama rivojlantirish uchun huquqiy asoslarni kuchaytirishga oid prezident qarori loyihasi ishlab chiqilishi belgilangandi. AOKA ishlab chiqqan qaror loyihasi hamon tasdiqlangani yo‘q.

Bundan 6 oy oldin AOKA direktori Asad Xodjayev Kun.uz savoliga javoban jurnalistik faoliyatga to‘sqinlik qilganlik uchun javobgarlik belgilash masalasi yil oxirigacha hal bo‘lishi mumkinligini aytgandi.

Ta’kidlash kerakki, qator qonunlarda jurnalistlarning bosimlar va tahdidlardan himoyalanishi qayd etilgan bo‘lsa-da, kodekslarda bunga nisbatan javobgarlik kiritilmagan.