Qashqadaryoda 4 yoshli bola noma’lum kasallikdan vafot etdi

Hozirda uning 6 yoshli opasi ham og‘ir ahvolda jonlantirish bo‘limida ekani va shifokorlar uning dardiga ham aniq tashxis qo‘ya olmayotgani aytilmoqda.

Foto: Getty Images

Ijtimoiy tarmoqlarda 2022 yil 20 iyun kuni Qashqadaryo viloyati G‘uzor tumanida yashovchi 4 yoshli bola noma’lum kasallikdan vafot etgani aytilgan xabarlar tarqaldi.

Unga ko‘ra, shifokorlar ahvoli og‘ir bo‘lgan bolani bir necha kun davomida tekshirib u qanday dardga chalinganini aniqlay olmagan. Shuningdek, Samarqand shahridan yordamga chaqirilgan shifokorlar ham bolaga aniq tashxis qo‘ya olmagan.

Holat yuzasidan Sog‘liqni saqlash vazirligi munosabat bildirdi. Unga ko‘ra, vazirlik tomonidan malakali professor-shifokorlardan iborat maxsus tibbiy brigada tuzilib, zudlik bilan G‘uzor tumaniga yuborilgan.

«Mazkur holatni o‘rganish va vaziyatga aniqlik kiritish maqsadida Sog‘liqni saqlash vazirligi tomonidan malakali professor-shifokorlardan iborat maxsus tibbiy brigada tuzilib, zudlik bilan G‘uzor tumaniga yuborildi. Sog‘liqni saqlash vazirligi bu holatni o‘z nazoratiga olgan. O‘rganish natijalari haqida batafsil ma’lumot beriladi», deyiladi SCV munosabatida.

#kasallik #G‘uzor tumani