“5 iyul kuni Qoraqalpog‘istonda hech qanday miting o‘tkazilmadi, komendantlik soati qoidalarini buzganlar kuzatilmadi” - Milliy gvardiya rasmiysi

Milliy gvardiya polkovnigi Hamidjon Dadaboyevning ma’lum qilishicha, Nukusda va Qoraqalpog‘istonning boshqa hududlarida bo‘lib o‘tgan noqonuniy namoyishlarda xorij fuqarolari ham ishtirok etgan. Lekin ularning aniq soni, shaxsiga oid ma’lumotlar tergov siri bo‘lib, surishtiruvlar yakuniga ko‘ra qo‘shimcha ma’lumot taqdim etiladi.

Shu bilan birga, Qozog‘iston bilan chegara bu mamlakat fuqarolari chiqib ketishlari uchun ochiqligi, qo‘shni davlat fuqarolarining Qoraqalpog‘istondagi tartibsizliklarda ishtirok etganiga oid ma’lumotlar bo‘lmasa, ular bemalol davlat chegaralaridan o‘tib ketishlari mumkinligi bildirildi.

Tadbirda qatnashgan Kun.uz muxbirining “5 iyul kuni Qoraqalpog‘istonda mitinglar o‘tkazilishi rejalashtirilgandi, ana shu mitinglar o‘tkazildimi? Shuningdek, komendantlik soati qoidalarini buzganlarga oid statistik ma’lumotlar bormi?” degan savollariga Milliy gvardiya rasmiysi shunday javob berdi:

– 5 iyul kuni Qoraqalpog‘iston hududida hech qanday miting o‘tkazilmadi. Hudud aholisi barcha masalalar mohiyatini anglagan holda bunday tadbirlarda ishtirok etmadi, noqonuniy namoyishlar kuzatilmadi. Komendantlik soati qoidalarini buzganlarga kelsak, belgilangan vaqtda ko‘chaga chiqqanlar surishtirilganda ular asosan zarurat tufayli, masalan, dorixonaga yoki tibbiy yordam izlab chiqqani yoki cheklovlardan bexabarligi ma’lum bo‘ldi. Komendantlik soati qoidalarini qasddan buzganlar qayd etilmadi. Nukus shahrida va umuman, Qoraqalpog‘iston hududida osoyishtalik hukm surmoqda.