Qariyb bir kunlik tanaffusdan so‘ng YHXB bazasi faoliyati tiklandi

IIV JXD YHXX axborot xizmatining xabar berishicha, hududiy Yo‘l harakati xavfsizligi boshqarmalarining ro‘yxatdan o‘tkazish va imtihon olish bo‘linmalari foydalanishida bo‘lgan tizimlar joylashgan server qurilmalarida kutilmagan texnik nosozliklar yuzaga kelgani sababli joriy yilning 5 iyul kuni soat 14:05 dan 6 iyul kuni soat 12:30 ga qadar vaqtincha tizimlar ishlamagan.

“Hozirda nosozliklar to‘liq bartaraf etilganini va tizim uzluksiz ishlab turganini ma’lum qilamiz. Yuzaga kelgan noqulayliklar uchun IIV JXD Yo‘l harakati xavfsizligi xizmati fuqarolardan uzr so‘raydi”, deyiladi xabarda.

Biroq na YHXX rasmiy saytida, na xizmatning ijtimoiy tarmoqlardagi sahifalarida serverda profilaktika ishlari olib borilayotgani, shu bois fuqarolarga xizmat ko‘rsatuvchi elektron tizimlar noma’lum muddatgacha ishlamasligidan ogohlantirish e’lon qilinmagan.

Qolaversa, tizim faoliyati tiklangani haqida soat 12:30 da yoki 13:00 da emas, balki nima uchundir 19:02 da ma’lum qilingan.

Garchi serverdagi nosozlik soat 12:30 da bartaraf etilgani xabar berilgan esa-da, Yagona interaktiv davlat xizmatlari portalining Telegram’dagi rasmiy kanalida soat 13:36 da e’lon qilingan xabarda YHXX serveri ishlamayotgani uchun ayrim xizmatlardan foydalanishda uzilishlar bo‘lishi haqida so‘z boradi. Bu esa tizim YHXX axborot xizmati xabar berayotganidek soat 12:30 da tiklanmaganini ko‘rsatmoqda.

“Ichki ishlar vazirligining Yo‘l harakati xavfsizligi xizmati server qurilmalarida texnik ishlar olib borilayotgani sababli my.gov.uz – Yagona interaktiv davlat xizmatlari portalidagi “Avtotransport vositalari oynalarining tusini o‘zgartirishga (qoraytirish) ruxsatnoma olish”, “Eski namunadagi milliy haydovchilik guvohnomalarini yangi namunadagi milliy haydovchilik guvohnomalariga almashtirish uchun ariza yuborish” va boshqa xizmatlardan foydalanishda uzilishlar kuzatilishi mumkin. Keltirilgan noqulaylik uchun uzr so‘raymiz”, deyiladi xabarda.

Eslatib o‘tamiz, YHXX serveri ishlamay qolishi kecha yoki bugun kuzatilayotgani yo‘q. Bundan bir oy muqaddam – 6 iyun kuni YHXB ro‘yxatdan o‘tkazish va imtihon olish bo‘linmalari foydalanishida bo‘lgan tizimlar joylashgan server qurilmalarida nosozliklar yuzaga kelgani sababli tizimlar vaqtincha ishlamay qolgandi.

2021 yilning noyabrida esa IIV YHXBB ma’lumotlar bazasi kiberhujumga uchragani oqibatida respublika miqyosida yo‘l harakati xavfsizligi qoidalarini buzganlik uchun belgilangan jarimalar haqidagi barcha ma’lumotlar o‘chib ketgani to‘g‘risida xabarlar tarqalgan, keyinchalik ushbu xabarlar haqiqatga to‘g‘ri kelmasligi bildirilgandi.