Samarqandda BMW ag‘darilib ketdi. Yo‘lovchi vafot etdi

Samarqand viloyati IIB YHXB axborot xizmatining Kun.uz’ga ma’lum qilishicha, 2022 yil 28 iyun kuni 4R-48 avtomobil yo‘lining Ishtixon tumani “Xonaqa” MFY hududidan o‘tuvchi 65-kilometrida odam o‘limi bilan bog‘liq yo‘l-transport hodisasi sodir bo‘lgan.

Mitan-Ishtixon yo‘nalishida harakatlanib kelgan BMW mashinasi haydovchisi boshqaruvni yo‘qotgan va mashina ag‘darilib ketgan.

Oqibatda ushbu mashinada yo‘lovchi sifatida ketayotgan fuqaro og‘ir tan jarohatlari olib, Ishtixon tumani tibbiyot birlashmasiga yotqizilgan. Ko‘rsatilgan muolajalarga qaramasdan u shifoxonada vafot etgan.

Dastlabki surishtiruvlarda aniqlanishicha, BMW qoidalarni buzgan holda katta tezlikda harakatlangan.

Qayd etilishicha, hodisa yuzasidan Jinoyat kodeksining 266-moddasi 2-qismi bilan jinoyat ishi qo‘zg‘atilgan.

Avvalroq, Samarqandda sodir bo‘lgan YTHda ikki kishi halok bo‘ldi, uch kishi tan jarohati olgandi.