“Butun xalqimiz sizlarni olqishlayapti” - Shavkat Mirziyoyev chempion shaxmatchilarni qo‘ng‘iroq qilib tabrikladi

O‘zbekiston prezidenti Shavkat Mirziyoyev 9 avgust kuni Hindistonning Chennay shahrida shaxmat olimpiadasi chempioni bo‘lgan o‘zbek yigitlarini telefon qilib qutladi. Suhbat videosini prezident matbuot xizmati e’lon qildi.

Davlat rahbari bilan telefonda jamoa nomidan Jahongir Vohidov gaplashdi. Prezident ularni g‘alaba bilan o‘zi va O‘zbekiston xalqi nomidan qutladi.

“O‘zingni ham oltin medal bilan tabriklayman. Nodirbek, Javohir, Shamsiddinni ham mening nomimdan o‘zing tabriklab qo‘y. Xudo xohlasa, O‘zbekistonda kutib olamiz, ko‘rishamiz. Tariximizda juda katta iz qoldirib, o‘zbek millati nimaga qodir ekanini yana bir marta namoyon etdilaring.

Juda xursandman, kayfiyatimga kayfiyat qo‘shildi. Butun xalqimiz sizlarni olqishlayapti. O‘zbekistonda bugun katta bayram, tarixiy bayram”, – dedi Shavkat Mirziyoyev.

Prezident yosh shaxmatchilarning katta-katta jamoalar bilan muvaffaqiyatli o‘yinlarini e’tirof etdi. “Niderlandiya bilan o‘yinlaringni ko‘rib qoyil qoldim. Xalqimiz nomidan tabriklayman, g‘alabalar muborak bo‘lsin. Iloyim oxirgisi bo‘lmasin”, – dedi u.

Davlat rahbari 2026 yilgi shaxmat Olimpiadasini O‘zbekistonda o‘tkazishga tayyorgarlik hozirdan boshlanishini aytdi.

“Tayyorgarlikni hozir sizlar boshlab berdilaring. Butun dunyo qoyil qoldiki, endi ular ham kelajakda O‘zbekistonga kelishga tayyorgarlik ko‘radi. Lekin biz undanam yaxshi tayyorgarlik qilamiz”, dedi prezident.

Shavkat Mirziyoyev qizlar terma jamoasi a’zolari va murabbiylarga ham prezidentning tashakkurini yetkazib qo‘yishni so‘radi va “Davay” deya go‘shakni qo‘ydi.

Eslatib o‘tamiz, bu O‘zbekiston tarixida erishilgan shaxmat olimpiadasining ilk chempionligi bo‘ldi.

Besh a’zodan iborat erkaklar terma jamoasi jami 11 ta tur natijasiga ko‘ra eng yaxshi natijani qayd etdi. Qolaversa, o‘zbekistonliklar musobaqa davomida birorta turda mag‘lubiyatga uchramagan yagona jamoa bo‘ldi.

Shu bilan birga, Jahongir Vohidov 4-taxtada o‘ynagan shaxmatchilar orasida oltin, Nodirbek Abdusattorov 1-taxtada kumush, Nodirbek Yoqubboyev 2-taxtada bronza medali sohibi bo‘ldi.

Ayollar terma jamoasi esa 162 jamoa orasida 31-o‘rinni egalladi.