“Bu XTV ishini kimdir qilyapti deganimas” – Sharifxo‘jayev darsliklar nazoratiga Prezident administratsiyasi aralashgani haqida gapirdi

Prezidenti administratsiyasi rahbari o‘rinbosari Komil Allamjonov maktab darsliklari sifati nazorati bo‘yicha Prezident administratsiyasi, Xalq ta’limi vazirligi, Ta’lim sifatini nazorat qilish inspeksiyasi va yana bir qator tashkilotlarning mas’ul vakillaridan iborat katta ishchi guruh tuzilishi haqida ma’lum qilgandi. Buning qanday ishlashini xalq ta’limi vaziri birinchi o‘rinbosari Usmon Sharifxo‘jayevning izohladi.

Uning aytishicha, vazirlik va administratsiya birgalikda ish olib boradi. Bu – xalq ta’limining ishini kimdir qilyapti, degani emas.

“Chunki bu jarayon birgalikda qilinmoqda. Xalq ta’limi tizimida ham siz aytgan darsliklarni xalq ta’limining o‘zi yozmaydi. U olimlar shu sohaga yaqin bo‘lgan mutaxassislar jalb qilinib yoziladi. Fanlar akademiyasi olimlari ham bor, oliy ta’lim vakillari ham bor, bevosita maktabda ishlaydigan ustozlarimiz ham bor.

Bu prezident administratsiyasiga alohida ustuvor yo‘nalish sifatida belgilangani bizni quvontiradi. Chunki bu bilan bizning ishimiz va natijadorligimiz ko‘proq va tezroq bo‘lishini, imkoniyatlar yanada kengayishini ko‘rib turibmiz”, – dedi Sharifxo‘jayev.

Shuningdek, Sharifxo‘jayev fikriga Xalq ta’limi vaziri o‘rinbosari Temur Komilov ham qo‘shimcha qildi. Unga ko‘ra, xalq ta’limini rivojlantirish bo‘yicha tasdiqlangan milliy kengash rahbari O‘zbekiston prezidentidir.

“Hududiy milliy kengashlarning rahbarlari viloyat va tuman rahbarlari hisoblanadi. O‘zlari aytganlariday birinchi raqamli ustuvor yo‘nalish ta’lim bo‘lganligi uchun ham Xalq ta’limini rivojlantirish milliy kengashining rahbari hududiy milliy kengash rahbarlariga, bizga ko‘mak sifatida mana shu topshiriqni berdilar”, – dedi u XTV matbuot anjumanida.