Turkiya Turkmaniston bilan viza rejimini joriy etdi 

Turkiya Turkmaniston bilan viza rejimini joriy etdi. Bu haqda “Hurriyet” gazetasi xabar berdi. 

Xabarda aytilishicha, Turkiya prezidenti Rajab Toyyib Erdo‘g‘an 13 sentabr kuni bu boradagi qarorni imzoladi. 

Avvalroq Turkmaniston hukumati Turkiyadan o‘z fuqarolari uchun vaqtinchalik viza rejimini joriy etishni so‘ragani haqida xabar berilgandi. 

«Turkmaniston fuqarolarining Turkiya Respublikasida bo‘lib turishi qoidalarini takomillashtirish va tizimli asosda yuritish maqsadida Turkmaniston tomoni Turkiyaga Turkmaniston fuqarolari uchun vaqtinchalik asosda turli toifadagi vizalar rejimini joriy etishni so‘rab murojaat qildi»,— deyilgandi Turkmaniston tashqi ishlar vazirligi xabarida. 

Bunga qadar Turkmaniston fuqarolari Turkiyada turistik maqsadlarda 30 kungacha vizasiz yurishi mumkin edi.