19:50 / 19.09.2022
11970

Turizm bo‘yicha videoselektorda 2 vazirlik va 2 qo‘mita rahbarlari qat’iy ogohlantirildi

Turizm vazirligi va hokimlarga 2023 yilda kamida 7 mln xorijiy hamda 12 mln ichki turistni jalb qilish topshirig‘i berildi.

Foto: Prezident matbuot xizmati

Shavkat Mirziyoyev raisligida o‘tkazilayotgan, ichki va tashqi turizm salohiyatini yanada oshirish chora-tadbirlariga bag‘ishlangan videoselektorda turizm vaziri Aziz Abduhakimov, moliya vaziri Timur Ishmetov, Soliq qo‘mitasi raisi Sherzod Qudbiyev va Bojxona qo‘mitasi raisi Akmalxo‘ja Mavlonov qat’iy ogohlantirildi.

Majlisda «dyuti fri» va «taks fri» tizimlarini joriy etish bo‘yicha qaror imzolanganidan 3 yil o‘tganiga qaramay, bu borada sustkashliklarga yo‘l qo‘yilayotgani tanqid qilindi. Ushbu tizim 2023 yil 1 yanvardan to‘liq ishga tushishi shart ekani aytildi.

Videoselektor yig‘ilishida sayyohlik tashkilotlariga qo‘yilgan talablarni soddalashtirish zarurligi ta’kidlandi. Misol uchun, bugungi kunda mehmonxona tashkil etish uchun 97 ta, «yulduz» olish uchun esa 138 ta talab mavjud.

«Agar turizm sohasida raqobat qilishni istasak, birinchi navbatda, mehmonxonalar sifatiga alohida e’tibor qaratishimiz zarur», dedi prezident.

Mehmonxonalar tashkil etish uchun talablarni xalqaro standartlar asosida soddalashtirish topshirildi. Turistlarni ichki ishlar idoralarida ro‘yxatga olish tizimi ham yengillashtirilishi lozimligi ko‘rsatib o‘tildi.

«Eng rivojlangan mamlakatlar ham har bir turist uchun talashayotgan paytda bizdagi ortiqcha cheklovlarning hammasini qayta ko‘rib chiqish kerak», dedi davlat rahbari.

Shu munosabat bilan turizm va ichki ishlar vazirlariga xorijiy turistlarni ichki ishlar idoralarida vaqtinchalik ro‘yxatdan o‘tkazish uchun ruxsat olishdan onlayn xabardor qilish tartibiga o‘tkazish topshirildi.

Yig‘ilishda turagentlarga litsenziya talabini bekor qilib, xabardor qilish tartibiga o‘tkazish bo‘yicha qaror loyihasini kiritish vazifasi qo‘yildi.

Umuman, Turizm vazirligi va viloyat hokimlari oldiga yangi imkoniyatlardan foydalanib, 2023 yilda kamida 7 million xorijiy va 12 million ichki turistni jalb qilish topshirig‘i berildi.

Kelgusi yilda turizm eksportini kamida 2 milliard dollarga yetkazish uchun barcha imkoniyatlar borligi ta’kidlandi. Yig‘ilish yakunida mutasaddilarning axboroti tinglandi.

Top