“Agar qo‘polroq o‘xshatish qilsak, Qozog‘iston xalqparvar siyosat qilmadi, iqtisodni bozor qoidalari nuqtayi nazaridan jamiyatiga tez kiritib yubordi, lekin biz hanuzgacha elektr energiyasini aholiga tannarxidan ikki barobar arzon sotayotgan davlatmiz. Ya’ni bu xalqparvar siyosat”, – dedi deputat Qozog‘iston va O‘zbekistondagi iqtisodiy islohotlarni solishtirib.
Oliy Majlis Qonunchilik palatasi spikeri o‘rinbosari Alisher Qodirov Kun.uz sayti tashkillashtirgan davra suhbatida O‘zbekiston va Qozog‘istonning rivojlanishi o‘rtasidagi farqni tahlil qildi. Unga ko‘ra, Qozog‘iston mustaqil bo‘lgach tezda bozor iqtisodiyotiga o‘tib ketdi va bu uning rivojlanishi uchun imkoniyat yaratdi. O‘zbekiston esa hozirgacha xalqparvar siyosat yuritmoqda va bu iqtisodiyotda ma’lum qiyinchiliklarga sabab bo‘lyapti.
“Bugun Qozog‘istonda yalpi ichki mahsulot kishi boshiga hisoblanganda 10 ming dollar bo‘lsa, O‘zbekistonda 1700 dollar atrofida.
Resurslar nuqtayi nazaridan Qozog‘iston va O‘zbekiston orasida katta farq yo‘q. Lekin aholi nuqtayi nazaridan O‘zbekiston ikki barobar oldinda. Bu – rivojlanish uchun Qozog‘istonga imkoniyat berdi. Agar qo‘polroq o‘xshatish qilsak, Qozog‘iston xalqparvar siyosat qilmadi, iqtisodni bozor qoidalari nuqtayi nazaridan jamiyatiga tez kiritib yubordi, lekin biz hanuzgacha elektr energiyasini aholiga tannarxidan ikki barobar arzon sotayotgan davlatmiz. Ya’ni bu xalqparvar siyosat. Xohlasangiz ham, xohlamasangiz ham. Elektr energiya arzon. Butun iqtisodiyotning lokomotivi bo‘lgan energiya resurslari masalasida biz hamon monopoliyada yuribmiz.
Aholi uchun energetika tariflarini oshirolmaysiz. Masalan, bugun elektr energiyasi 295 so‘m. Uni 550 so‘m qilolasizmi? Yo‘q, chunki odamlarning daromadi yetmaydi. Odamlarning daromadi yo‘q bo‘lishiga sabab nima? Iqtisodiyot rivojlanmagan. Iqtisodiyot rivojlanmasligiga sabab nima? Energiya resurslarimizda aniq o‘yin qoidalari yo‘q. Yirik investorlar bizga kelib pul tikishdan oldin iqtisodiy masalalarni tahlil qilishda birinchi tahliliy masala energiya bilan bog‘liq bo‘ladi. Investor u yerdagi noaniqlik, beqarorlikni ko‘radi va bu rivojlanishimizga salbiy ta’sir ko‘rsatadi.
Biz axborot erkinligini tahlil qilishdan oldin masalaning bu tomonlarini ham o‘ylab ko‘rishimiz va taroziga solishimiz lozim. Undan keyin gapirish kerak”, – dedi Alisher Qodirov.
Kun.uz Qonunchilik palatasi spikeri o‘rinbosari fikrlari borasida Energetika vazirligi matbuot xizmati bilan bog‘landi. Vazirlik matbuot kotibi Sabina Bekmurodova Qodirov so‘zlarini tasdiqlagan holda chindan ham, elektr energiyasi aholiga tannarxidan ikki barobar arzon yetkazib berilayotganini bildirdi.
