19:41 / 30.10.2022
28203
«Насаф» «Навбаҳор»ни мағлуб этиб, Ўзбекистон кубоги соҳибига айланди

Ўзбекистон кубоги финали доирасида «Навбаҳор» ва «Насаф» ўртасидаги учрашув якунланди. 120 дақиқа давом этган Бухородаги ҳал қилувчи ўйинда Рўзиқул Бердиев жамоаси Самвел Бабаян шогирдларини мағлуб этди.

Фото: Tribuna.uz

«Бухоро» спорт мажмуасига мухлислар оқими 3-4 соат аввал бошланиб, финал бошлангунга қадар 22 мингдан ортиқ томошабинга мўлжалланган аренада 18 мингга яқин томошабин тўпланди.

Учрашув икки томоннинг эҳтиёткор ҳаракатлари билан бошланган бўлса-да, Рўзиқул Бердиев мураббийлигидаги жамоа дастлабки дақиқалардан ўйиндаги устунликни ўз қўлига олишга интилди. 29-дақиқага келиб стадион ларзага келди. Марко Станоевичнинг узатмасини Акмал Мозговой дарвозага йўллаб, ҳисобни очди – 1:0.

Иккинчи бўлимнинг 57-дақиқасида эса Зоран Марушичнинг ажойиб узатмасини Дониёр Абдуманнопов қаршиликлар дарвозасига йўллаб, ҳисобдаги мувозанатни тиклади – 1:1.

Иккинчи бўлимнинг сўнгги дақиқаларида воҳаликлар ҳужумкорликни оширган бўлишса-да, водий клуби ҳимояда бехато ўйнаб, баҳснинг 120 дақиқа давом этишини таъминлади.

Экстра-таймларнинг биринчисида эса қаршиликлар форварди Лима Круз 100-дақиқада стадионни ларзага келтириб, жамоасини яна ҳисобда олдинга олиб чиқди – 2:1.

Шу тариқа, ушбу гол «Насаф»га Ўзбекистон кубогида ғолибликни келтирди. Рўзиқул Бердиев жамоаси ўтган йил Самарқанддаги кубок финалидан кейин Бухорода кетма-кет иккинчи кубок эгасига айланди. 

30 октябрь (якшанба)
Ўзбекистон кубоги. Финал 
«Навбаҳор» – «Насаф» 1:2

Голлар:Дониёр Абдуманнопов 57 - Акмал Мозговой 29, Лима Круз 100.
«Навбаҳор»: 1.Ўткир Юсупов, 4.Боян Цигер, 6.Рустам Ашурматов, 10.Жамшид Искандеров, 14.Жамшид Болтабоев, 20.Дониёр Абдуманнопов (17.Диёрбек Туропов, 83), 22.Игорь Голбан, 23.Йован Жокич, 24.Даврон Ҳошимов (28.Станислав Андреев, 70), 32.Зоран Марушич, 77.Асадбек Собиржонов.
«Насаф»: 35.Абдувоҳид Неъматов, 2.Алибек Давронов, 4.Ҳусниддин Алиқулов, 5.Ғолиб Ғайбуллаев, 7.Шароф Муҳитдинов (34.Шерзод Насруллаев, 63), 8.Дилшод Саитов (27.Зафармурод Абдираҳматов, 98), 19.Матеус Лима Круз, 22.Акмал Мозговой, 77.Ойбек Бозоров (18.Баҳром Абдураҳимов, 63), 88.Марко Станоевич, 92.Умар Эшмуродов.

Top