UzAuto Motors yana aldadi. Onix va’da qilinganidan ancha qimmat narxlarda sotuvga chiqarildi

Bugun, 1 noyabrdan boshlab UzAuto Motors kompaniyasi Chevrolet Onix avtomobili uchun shartnoma berishni boshladi.

Ayni vaqtda Chevrolet Onix avtomobilining quyidagi komplektatsiyalariga buyurtma berish mumkin:

• 1,2 MT soddalashtirilgan komplektatsiya*– 126 500 000 so‘m;
• 1LS 1,2 MT komplektatsiya –152 996 000 so‘m;
• 1LT 1,2 MT komplektatsiya –159 160 000 so‘m;
• 3LT 1.2 MT komplektatsiya –163 254 000 so‘m;
• LTZ 1,2 Turbo AT komplektatsiya –189 957 000 so‘m.

Narxlar qo‘shimcha qiymat solig‘i bilan ko‘rsatilgan.

Eng arzon komplektatsiya(126,5 mln so‘mlik), ro‘yxatda bo‘lsa-da, sotuvga chiqarilmagan.

«Olmoqchi bo‘lgan xaridorlar ariza berar ekan, agar yetarli ariza to‘plansa (yetarli deganda qancha ariza nazarda tutilayotgani noma’lum), keyin kompaniya bu pozitsiyani ishlab chiqarish yoki chiqarmaslikni o‘ylab ko‘rarkan. Xullas, katta ehtimol bilan bunaqa arzon komplektatsiyadan umid qilmasa ham bo‘ladi», - deya yozadi huquqshunos Xushnudbek Xudoyberdiyev.

E’tiborga molik jihati, UzAuto Motors o‘z rasmiy sahifasida Chevrolet Onix narxlarini QQSsiz keltirib o‘tgan. Bu avtomobillar narxini nisbatan arzon qilib ko‘rsatishga urinish bo‘lishi mumkin.

2023 yil 1 yanvardan boshlab qo‘shilgan qiymat solig‘i stavkasi hozirgi 15 foizdan 12 foizga tushiriladi. Demak, keyingi yildan boshlab, Chevrolet Onix narxlari ham 3 foizga arzonlab, quyidagicha sotilishi kerak.

• 1LS 1,2 MT komplektatsiya –149 004 000 so‘m;
• 1LT 1,2 MT komplektatsiya –155 008 000 so‘m;
• 3LT 1.2 MT komplektatsiya –158 995 000 so‘m;
• LTZ 1,2 Turbo AT komplektatsiya –185 001 000 so‘m. 

Ajiotaj va turnaqator navbatlar

Chevrolet Onix sotuvi boshlanishi ortidan avtosalonlarda shartnoma olish uchun turnaqator navbatlar yuzaga kela boshladi.

Qariyb 5 soat ichida 13566 tadan ortiq shartnomalar imzolangan bo‘lib, shundan 55 foizi Onix’ning LTZ Turbo AT komplektatsiya uchun tuzilgan.

Qayd etilishicha, 7 380 nafar xaridor ikki va undan ortiq avtomobil xarid qilish uchun shartnoma tuzgan, bu umumiy iste’molchilar sonining 45 foizdan ortig‘ini tashkil etadi.

“Avtomobillarni qayta sotish ehtimoli bilan tuzilgan shartnomalar aniqlangan taqdirda, kompaniya shartnoma shartlariga muvofiq (3.1.2 bandga muvofiq) avtomobilni yetkazib berish muddatini qo‘shimcha 120 kunga oshiradi. Shu munosabat bilan, xaridorlardan shartnomani imzolashdan oldin uning barcha bandlari bilan to‘liq tanishib chiqishlarini iltimos qilamiz”, deyiladi kompaniya xabarida.

Shuningdek, 60 foizgacha tuzilgan shartnomalarning to‘lovlari vaqtida amalga oshirilmagan. Bu esa 7 kundan so‘ng, shartnomalar soni sezilarli darajada kamayib, avtomobil yetkazib berish muddati qisqarishiga olib kelishi mumkin.

UzAuto Motors yana aldadi

O‘tgan yilning bahorida o‘sha paytda UzAuto Motors kompaniyasi direktori vazifasini bajaruvchi bo‘lib ishlagan Rustam Rajabov Onix narxi 9-12 ming dollar oralig‘ida bo‘lishini ma’lum qilgandi.

«Avval Matiz ishlab chiqarilgan liniya Onixʼga moslab qayta quriladi va yangi modelni ishlab chiqarish 2022 yilning 4-choragi yakunida lokalizatsiya qilinadi», deya ta’kidlagandi Rajabov jurnalistlar bilan uchrashuvda.

Ammo 1 noyabrdan shartnoma berilishi boshlangan Chevrolet Onix avval va’da qilingan narxdan anchagina qimmat bo‘lib chiqdi.

Kun.uz muxbirining shartnoma imzolagan mijozlarga tayanib ma’lum qilishicha, ilk xaridorlarga avtomobillar keyingi yilning iyun oyidan boshlab yetkazib berila boshlashi mumkin.

Tracker va Onix'ni ishlab chiqarish boshlanishi bilan, shu yil oxirida Spark va Nexia ishlab chiqarish to‘xtatilishi e’lon qilingan. Shu tariqa, faqat avtomat uzatmali varianti 127 mln so‘m yoki 11 300 dollardan sotilayotgan Cobalt “O‘zavto”ning eng arzon sedaniga aylanadi.

Kun.uz muxbiri avtosalondagi xaridorlarga bir qancha savollar bilan murojaat qilgan bo‘lsa-da, ammo hech kimning gapirgisi kelmagan:

1) Onix Spark narxida bo‘ladi deyishgandi, e’lon qilingan narxlar aksini ko‘rsatyapti. Onix narxi sizga ma’qulmi? Puliga arziydimi?

2) Pulini oldindan to‘lab, mashinani 1 yildan keyin olishga rozimisiz?

3) Ijtimoiy tarmoqlarda GM monopoliyasi tinimsiz tanqid qilinadi. Lekin avtosalonlarda Onix uchun ur-yiqit. Boshqa markadagi mashinalar uchun ham navbatlar katta. Sizningcha buning sababi nimada?

4) Yangi model haqida hamma ma’lumotdan xabardormisiz? Masalan, Onix’ga gaz qo‘yib bo‘lmaskan, Turbo modellar faqat eng qimmat benzinda yuradi degan gaplar chiqdi. Shularni o‘rganib keyin to‘lov qilyapsizmi yo tavakkaliga sotib olyapsizmi?

5) Mashinani sotib olgandan keyin qancha muddat haydamoqchisiz? Yoki oliboq bozorga olib chiqasizmi?

6) 4 soat ichida 12 mingta shartnoma rasmiylashtirilibdi. Siz nechanchi navbat bo‘ldingiz?

Savollar ko‘p, ammo hech kim javob berishni xohlamaydi.