OAV Lavrov Balida shifoxonaga yotqizilganini xabar qildi. Zaxarova buni rad etib, vazir bilan bog‘dagi videosini e’lon qildi

Dastlab Associated Press agentligi Indoneziyadagi rasmiy shaxslarga asoslanib, Lavrov sog‘ligida muammo tufayli shifoxonaga yotqizilgani haqida xabar tarqatdi. Keyinroq Bloomberg va Reuters ham mahalliy rasmiy manbalarga tayanib, Lavrov shifoxonaga borgan haqida xabar berdi.

Indoneziyadagi tibbiyot sohasidagi uchta rasmiy manba Associated Press muxbiriga rossiyalik vazir Balida shifokorlarga murojaat qilganini aytishgan. Ularning barchasi o‘z shaxslarini anonim tutishni so‘ragan.

Manbalardan ikki nafari Lavrovning yuragida muammo yuzaga kelganini aytishgan. Ular vazirni Bali provinsiyasi poytaxti Denpasar shahridagi Sangla shifoxonasiga olib kelishganini tasdiqlashgan.

Rossiya delegatsiyasiga rahbarlik qilayotgan Lavrov 13 noyabr kuni G20 sammiti uchun yetib kelgan. Putin Baliga kelmaydi - bunday qaror haqida to‘rt kun muqaddam Kreml matbuot xizmati rahbari Dmitriy Peskov ma’lum qilgandi. Putinning sammitda ishtirok etishi masalasi bir necha oy davomida muhokama etilgan va  Ukrainaga qarshi urush bilan bog‘langandi. Ukrainlar prezidenti Volodimir Zelenskiy sammitda onlayn-formatda ishtirok etishni rejalashtirgan.

Rossiya TIV rasmiysi Mariya Zaxarova Lavrovning shifoxonaga yotqizilgani haqidagi xabarlarni «feyk» deb atadi. «Biz bu yerda Indoneziyada Sergey Viktorovich bilan xabarlar lentasini o‘qiyapmiz va o‘z ko‘zlarimizga ishonmayapmiz: xabarlarga ko‘ra, u shifoxonaga yotqizilgan bo‘lib chiqyapti. Bu albatta, yuqori miqyosli feyklar», deya yozdi u o‘z telegram-kanalida.

«Unda, jahon miqyosidagi eksklyuzivni kuting», deya qo‘shimcha qildi u va keyinroq bog‘da futbolka va shortida o‘tirgan Lavrov bilan videoni namoyish etdi.

«Bizning prezident haqida ham o‘n yildan beri betobligi haqida yozib kelishadi. Bu umuman olganda siyosatda yangilik bo‘lmagan o‘yindir», deydi Lavrov videoda.

Zaxarovaning g‘arblik jurnalistlarga nima deyishi haqidagi savoliga javoban Lavrov shunday javob bergan: «Rostgo‘yroq bo‘ling». Videoda Lavrovning oldidagi stolda qog‘ozlar, ruchka va mobil telefoni turganini ko‘rish mumkin. Vazir G20 doirasidagi yig‘ilishlarga tayyorgarlik ko‘rayotganini aytgan.

Bali gubernatori I Vayan Koster keyinroq Reuters agentligiga Sergey Lavrov chindan ham shifoxonada bo‘lgani va tibbiy ko‘rikdan o‘tkazilganini tasdiqladi. Shu bilan birga u vazirning salomatligi yaxshi ekanini aytgan.

G20 sammiti Balida 15-16 noyabr kunlari bo‘lib o‘tadi. Zaxarova avvalroq Lavrov Indoneziyada faxriy qorovul va «tantanali raqslar» bilan kutib olingani haqida yozgandi.