“Qaror jiddiy va keskin bo‘ladi”. Tanqidiy maqoladan keyin uchastkavoyga chora ko‘riladigan bo‘ldi

Samarqand viloyati Ichki ishlar boshqarmasi bugun, 14 noyabr kuni Kun.uz'da e’lon qilingan “Lyuboy” ishni bittada bitiradigan” profilaktika inspektori jazosiz qoldi” sarlavhali xabar yuzasidan tezkor munosabat bildirdi.

IIBB matbuot xizmati rahbari Jahongir Sa’dullayevning bayonotida Kun.uz'ning maqolasidagi “tanqid va e’tirozlar o‘rinli” ekani ta’kidlangan.

“Albatta, ushbu holat jamoatchilik orasida “Samarqand IIBda shunday xodimlarga joy bor ekan-da, qonunlarni buzgan xodimlar jazosiz qolaverar ekan-da”, degan fikrni keltirib chiqaradi. Aslo! Nashrning ushbu maqolasini ham shaxsan boshqarma boshlig‘i bilan o‘tirib muhokama qildik. Boshqarma boshlig‘i Rahmat Toshnazarovich doim bir gapni ta’kidlaydilar: “Bizning maqsadimiz xalqni rozi qilish, unga xizmat qilish, uning dardu-tashvishlari bilan yashash. Qaysi xodim buni chuqur anglab, xizmatini shu mezonda olib bormas ekan oramizda ularga joy yo‘q”.

Biz tizim sha’niga putur yetkazuvchi, o‘z manfaatlarini fuqarolar manfaatidan ustun qo‘yadigan, qo‘pol, kasb madaniyatini bilmaydigan xodimlardan shu zahoti voz kechamiz. Kechyapmiz ham, ko‘rsatyapmiz ham.

Yuqoridagi holat ham tegishli xizmatlarimiz tomonidan atroflicha o‘rganib chiqildi. Yaqinda boshqarma boshlig‘i ushbu profilaktika inspektorini katta yig‘ilishda otasi ishtirokida ham qattiq ogohlantirgandi. Xulosa bo‘lmayapti. Tez kunlarda ushbu profilaktika inspektori bo‘yicha shunday qaror qabul qilinadiki, qaror jiddiy va keskin bo‘ladi. Buni keng jamoatchilikka e’lon qilamiz”, – deyiladi rasmiy munosabatda.

Qo‘shimcha qilinishicha, viloyat IIBB boshlig‘i Rahmat Mamatov bugun, 14 noyabrda Pastdarg‘om tumani IIB shaxsiy tarkibi bilan tanqidiy yig‘ilish o‘tkazgan, unda inspektor Salohiddin Pardaqulov masalasida ham so‘z borgan.

Eslatib o‘tamiz, Pardaqulov 2022 yilning 20 yanvar kuni o‘zi ishlayotgan mahalladagi fuqaroning “Equinox” avtomobilini hujjatsiz boshqargan. U avtomobilda yo‘l harakati qoidalarini bir necha marta qo‘pol tarzda buzgan va boshqa mashinaga borib urilgan. Aynan YTH sodir etilishidan avvalgi holatlar ham videoregistratorga yozib olingan. Biroq sudda boshqa fuqaro aybdor deb topilgan va “Equinox”ga yetkazilgan 62,5 million so‘m zararni u to‘lashi belgilangan.

Rahmat Mamatov asl vaziyat qanday bo‘lganini bilganidan so‘ng, profilaktika inspektorini mard va vijdonli bo‘lishga chaqirgandi.