Erdo‘g‘an Rossiyani Suriyada terrorizmga qarshi kurash bo‘yicha majburiyatlarini bajarmaganlikda aybladi 

Bugun Turkiya Harbiy-havo kuchlarining 50 dan ortiq F-16 qiruvchi samolyoti Suriyadagi o‘zini o‘zi mudofaa qilish qo‘shinlari va Kurdiston ishchilar partiyasining pozitsiyalariga hujum qildi, 20 ga yaqin Bayraktar Akinci dronlari «Tirnoq-qilich» operatsiyasida ishtirok etdi.

«Bir necha marta ogohlantirishimizga qaramay, 2019 yilgi Sochidagi kelishuvimizga ko‘ra, shimoliy Iroq va Suriyani terrorchilardan tozalashga mas’ul bo‘lgan Rossiya o‘z burchini bajarmadi va bajarishdan bosh tortmoqda... Turkiya buni qabul qila olmaydi, terrorizmga qarshi jim tura olmaymiz va chora ko‘ramiz. Biz terrorchilarning Kobanidagi 12 ta uyasini yo‘q qildik», deb tushuntirdi Erdo‘g‘an.

Turkiya prezidenti kurd tuzilmalari pozitsiyalariga havodan ham, yerdan ham zarba berishda davom etishini ta’kidladi. Turkiya qurolli kuchlari Suriyaning Kobani mintaqasidagi barcha nishonlarni yo‘q qilgani aytilmoqda.

Turkiya 20 noyabr kuni Suriya va Iroq hududlariga havodan zarbalar berdi. Anqarada boshlangan «Tirnoq-qilich» operatsiyasidan maqsad Istanbuldagi olti kishining hayotiga zomin bo‘lgan terakt uchun mas’ul bo‘lgan kurd jangarilarining bazalarini yo‘q qilish deb ataldi. Suriya kurdlari kechagi otishmalar oqibatida 30 kishi halok bo‘lganini xabar qildi.