O‘zbekistonda gaz zapravkalar bir necha kun ishlamasligi haqidagi xabarlar rad etildi

Ijtimoiy tarmoqlarda O‘zbekistonda metan gaz zapravkalari 3-4 kun ishlamasligi mumkinligi haqida xabarlar tarqaldi. «Hududgazta’minot» matbuot xizmati buni rad etdi.

«Ayni paytda gaz ta’minoti sohasi xodimlari tomonidan aholi va ijtimoiy soha obektlarini uzluksiz tabiiy gaz bilan ta’minlash uchun barcha zarur choralar ko‘rilmoqda. Shu munosabat bilan magistral gaz quvurlarida bosimning pasayishi bilan bog‘liq vaziyat ayrim joydagi mahalliy tarmoqlarga ta’sir ko‘rsatgani sababli ba’zi hududlarda viloyat hokimliklari tomonidan avval tasdiqlangan AGQKSh ish jadvallariga o‘zgartirishlar kiritilmoqda», deyiladi rasmiy xabarda.

«Hududgazta’minot» AJ ijtimoiy tarmoq faollari va OAV vakillaridan asossiz ma’lumotlarni tarqatmaslik va iste’molchilarni chalg‘itmaslikni so‘radi.

Bundan oldinroq O‘zbekistonning qator hududlarida aholi gaz tanqisligidan shikoyat qilayotgani xabar qilingandi. Facebook’dagi «Potrebitel.uz» guruhiga 3 dekabr kuni fuqarolardan bir necha murojaatlar kelib tushgan.

Unda aytilishicha, ayrimlarda gaz umuman bo‘lmagan, ayrimlarida uning bosimi pastligidan choy qaynashini ham yarim soatlab kutishgan. Gaz ta’minotidagi muammolar haqida Samarqand, Qo‘qon, Sirdaryo, Toshkent shahri va viloyati aholisi xabar bergan.

Xususan, Toshkent viloyatida bunday murojaatlar Yangiyo‘l, Zangiota, G‘zalkent, Chirchiq, Bardanko‘l, Chorvoq va Bo‘stonliq qishloqlaridan kelib tushgan. Toshkent shahrida Shayxontohur, Mirzo Ulug‘bek, Yashnobod, Yakkasaroy, Mirobod, Segeli tumanlaridan shikoyatlar bo‘lgan. Yunusobod va Bektemir tumanlaridan gaz ta’minoti borasidagi murojaatlar nisbatan kamroq bo‘lgan.