Administratsiya rahbari barqaror elektr va gaz ta’minoti hamda ko‘mir yetkazib berish bo‘yicha qat’iy topshiriqlar berdi

Bu haqda Prezident administratsiyasi rahbari Sardor Umrzoqov boshchiligida qishni betalafot o‘tkazish bo‘yicha navbatdagi videoselektor yig‘ilishida ma’lum qilingan. 

Administratsiya rahbari «Hududiy elektr tarmoqlari» AJ raisi Ulug‘bek Mustafoyevga respublika hududlarida avariyalarni bartaraf qilish bo‘yicha brigadalar sonini ko‘paytirish va avariyalarni to‘liq bartaraf etish choralarini ko‘rish vazifasini topshirdi.

Hududlarda yo‘l qo‘yilgan cheklov va yuz bergan avariyalar oqibatida elektr energiyasining uzilishi aholining haqli e’tiroziga sabab bo‘layotgan ta’kidlab o‘tildi.

«Bizga kelgan ma’lumotlarga ko‘ra, «O‘ztransgaz»ga qarashli kompressor stansiyalarida ham jiddiy kamchiliklar mavjud. Jami 37 ta agregatdan 21 tasi ta’mirtalab», — dedi S.Umrzoqov.

Yig‘ilishda energetika vaziri Jo‘rabek Mirzamahmudov va «O‘ztransgaz» rahbari Bekzod Normatovga barcha agregatlar zudlik bilan ishchi holatiga keltirish vazifasi topshirildi.

«Nosoz agregatlar boshqa qurilmalar zo‘riqish bilan ishlashiga olib kelib, texnik nosozliklar kelib chiqishiga va iste’molchilarni barqaror tabiiy gaz bilan ta’minlash imkonini yo‘qqa chiqaradi», — dedi S.Umrzoqov.

Shuningdek, bir qator tumanlarda aholini ko‘mir bilan ta’minlash ham talab darajasida emasligi ta’kidlab o‘tildi.

Ko‘mir yetkazib berish ko‘rsatkichlari Qashqadaryo viloyatining Ko‘kdala (20 foiz) va Qarshi (38 foiz) tumanlarida hamda Navoiy viloyatining Karmana tumanida (22 foiz) ancha past darajada qolayotgani qayd etildi.

Energetika vaziri o‘rinbosari Sherzod Xo‘jayev, «O‘zbekko‘mir» AJ bosh direktori o‘rinbosari Erkin Yoqubov, «O‘zbekiston temir yo‘llari» AJ boshqaruv raisi Husniddin Hasilovga ko‘mir yetkazib berish bo‘yicha tasdiqlangan yetkazib berish grafigi ijrosini qat’iy ta’minlash vazifasi tayinlandi.