Elektr energiyasini mutlaq ko‘p ishlatadigan xonadonlar uchun tariflarni vaqtincha oshirish taklif etilmoqda

O‘zbekistonda tabiiy gaz va elektr energiyasidan foydalanganlik uchun narxlar oshirilishi rejalashtirilganmi? Narxlar oshirilishida aholining quyi qatlamlari daromadlari ham hisobga olinganmi?

Mazkur ikki savolga javoban energetika vazirining o‘rinbosari Sherzod Xo‘jayevning aytishicha, bu boradagi tegishli taklif hukumatga kiritilgan.

“Tabiiy gaz va elektr energiyasi uchun tariflarni qayta ko‘rib chiqish jarayonida, ekspertlar tomonidan bazaviy tariflarni o‘zgarishsiz qoldirib, ma’lum bir miqdordan ko‘proq iste’mol qilingan holatlarda uning narxini keskin oshirish bo‘yicha takliflar berilgan. Hozirgi kunda mazkur takliflar hukumat tomonidan ko‘rib chiqilmoqda”, – deya Xo‘jayevning so‘zlarini keltirmoqda vazirlik matbuot xizmati.

Kun.uz'ning energetika tizimidagi manbasiga ko‘ra, vazirlik hukumatga taklif sifatida kiritgan limit oyiga 1000 kVt bo‘lib, bahorgacha oylik limitdan ko‘p elektr energiya ishlatgan xonadonlarni keyingi oy boshigacha tarmoqdan uzib qo‘yish varianti ham bor.

Manbaning so‘zlariga ko‘ra, maishiy iste’molchilar (ya’ni aholi xonadonlari) orasida oyiga ming kilovattdan ko‘p elektr ishlatadiganlarning ulushi 3-5 foizni (daromadi eng yuqori qatlam) tashkil etadi. Taklif etilayotgan chora ularni hozirgidek resurslar tanqisligi va uzilishlar sharoitida energiyani isrof qilmaslikka undashi ko‘zda tutilgan.

Ta’kidlash lozim, O‘zbekistonda energoresurslar aholiga haqiqiy narxidan pastroq, subsidiyalangan narxlarda yetkazib beriladi. Iste’molchilar tabaqalashtirilmagani sababli kim ko‘p energiya ishlatsa, davlat unga shuncha ko‘p subsidiya to‘laydi. Energiyani esa daromadi yuqori xonadonlar daromadi past xonadonlarga nisbatan sezilarli ko‘proq ishlatadi va shunga muvofiq, daromadi yuqori aholi davlatdan sezilarli ko‘p subsidiya oladi.

9 dekabr kuni Energetika vazirligi matbuot xizmati taqdim etgan savol-javoblarda vazir o‘rinbosari Sherzod Xo‘jayev: “Ayni paytda gaz va elektr energiyasi muammosini bartaraf etish uchun budjetdan qo‘shimcha mablag‘ ajratish ko‘zda tutilganmi?” degan savolga ham javob bergan.

“Hozirgi kunda issiqlik elektr stansiyalariga yetarli miqdorda tabiiy gaz yetkazib berishning imkoni bo‘lmagani tufayli zaxira yoqilg‘isi sifatida mazutdan foydalanilmoqda.

Mazut esa xorijdan eksport qilinadi. Mazut orqali ishlab chiqarilgan elektr energiyasining tannarxi – 1500 so‘m atrofida. Lekin aholiga sotilayotgan narx – 295 so‘m. Orada yuzaga kelayotgan farq esa davlat tomonidan issiqlik elektr stansiyalariga subsidiya berish orqali qoplab beriladi”, – degan u.