Namoyishchilarni qo‘lga olishda vakolatidan chetga chiqqan kuch tuzilmalari xodimlari javobgarlikka tortiladi – Bosh prokuratura

Bosh prokuratura Qoraqalpog‘iston voqealarini o‘rganish maqsadida tashkil etilgan Mustaqil komissiya so‘roviga javoban ma’lum qilishicha, 1-2 iyul kunlari o‘tkazilayotgan ommaviy tartibsizliklar vaqtida hamda aybdorlarni qo‘lga olish jarayonida huquqni muhofaza qiluvchi organlarning xodimlari xizmat vakolatidan chetga chiqib, zaruriyatsiz kuch va vositalarni ishlatgani tasdig‘ini topgan taqdirda, ular javobgarlikka tortiladi.

“Jamoat tartibini saqlashga safarbar kilingan huquqni muhofaza qiluvchi organlar xodimlari tomonidan ommaviy tartibsizlik ishtirokchilariga nisbatan qurol va maxsus vositalar qo‘llangani holatiga alohida ish yurituviga ajratilgan jinoyat ishi doirasida huquqiy baho beriladi”, deyiladi rasmiy ma’lumotda.

Bundan tashqari ommaviy tartibsizliklar chog‘ida 2 nafar fuqaroning vafoti holati yuzasidan Jinoyat kodeksining tegishli moddalari bilan qo‘zg‘atilgan jinoyat ishlari doirasida prokuratura idoralari tomonidan dastlabki tergov harakatlari olib borilayotgani ma’lum qilingan. Tergov yakuniga ko‘ra, aybdor deb topilgan shaxslarga nisbatan qonuniy qarorlar qabul qilinishi ta’minlanadi.

Ta’kidlanishicha, Nukus voqealari paytida vafot etgan 19 nafar shaxsning ro‘yxati va vafot etish sabablari (qiynoqdan, o‘qotar quroldan va maxsus vositalardan vafot etgani) ochiq sud majlislari davomida birma-bir muhokama qilinadi.

Bosh prokuraturaga ko‘ra, xizmat vakolatidan chetga chiqib, zaruriyatsiz kuch va vositalarni ishlatgan kuch tuzilmalari xodimlariga nisbatan qonuniy chora ko‘rilgan taqdirda ularning ishlari ochiq sud majlislarida ko‘rib chiqiladi.

Ommaviy tartibsizliklar oqibatida fuqarolarga, jamiyat va davlat manfaatlariga yetkazilgan umumiy zarar summasi ekspertlar tomonidan 6,6 mlrd so‘m deya baholangan. “Zararlarni aybdor shaxslardan solidar tartibda undirish masalasi sud tomonidan ko‘rib chiqiladi”, deyiladi Bosh prokuratura tomonidan Mustaqil komissiyaga taqdim etilgan ma’lumotda.

Qayd etilishicha, Nukus voqealari yuzasidan sudlanayotganlar orasida chet el fuqarolari mavjud emas.

Eslatib o‘tamiz, 1-2 iyul kunlari Nukus shahrida ro‘y bergan tartibsizliklardan keyin, prezident Qoraqalpog‘iston hududida bir oy muddatga favqulodda holat rejimi joriy etgandi.

Iyul oyida Qonunchilik palatasi va Senat tomonidan Qoraqalpog‘iston voqealari yuzasidan mustaqil tekshiruv o‘tkazish uchun Mustaqil komissiya tuzilgan, unga ombudsman Feruza Eshmatova rahbarlik qilishi xabar qilingandi. Mustaqil komissiya a’zolari 15 avgust kunidan yana ish boshlagandi.

Avvalroq Mustaqil komissiya Bosh prokuraturaga murojaat qilib, Qoraqalpog‘iston voqealariga doir sud jarayonlarida ishtirok etish davomida yuzaga kelayotgan va keng aholi vakillarini xavotirga solayotgan holatlarga oydinlik kiritishni so‘ragandi.

28 noyabr kuni Nukus voqealari bo‘yicha 22 nafar sudlanuvchiga oid jinoyat ishini ko‘rib chiqish boshlangandi. Bosh prokuratura yana 39 kishiga daxldor ikkinchi jinoyat ishi bo‘yicha tergov yakunlanayotganini, Qoraqalpog‘istondagi ommaviy tartibsizliklarni uyushtirishda jami 171 kishi ayblanayotganini ma’lum qilgan.