Yarim yillik rotatsiya jarayonida Yevropa Ittifoqi kengashi raisligining vakolatlari Chexiyadan Shvetsiyaga o‘tdi. Shvetsiya allaqachon Ukrainani qo‘llab-quvvatlashda davom etishini e’lon qildi.
1 yanvar, yakshanba kuni Yevropa Ittifoqi kengashiga raislik qilish huquqi Shvetsiyaga o‘tdi - Skandinaviya mamlakati bu lavozimda Chexiyani har olti oyda bir marta o‘tkaziladigan rejalashtirilgan rotatsiya vaqtida almashtiradi.
Oktabr oyidan boshlab Shvetsiyada yangi hukumat ish boshladi, u mamlakatda migratsiya siyosatini kuchaytirish tarafdori bo‘lgan mahalliy demokratlar tomonidan qo‘llab-quvvatlanmoqda. Bu ushbu sohada va Yevropa Ittifoqi darajasida murosa topishni qiyinlashtirishi mumkin, deya qayd etadi AFP.
Bundan tashqari, Shvetsiya AQSh prezidenti Jo Bayden tomonidan Qo‘shma Shtatlar sanoati uchun tasdiqlangan «ekologik subsidiyalar» bilan bog‘liq holda AQSh bilan muhokamada YeI nomidan ishtirok etishi mumkin. Yevropa Ittifoqidagi tanqidchilar amerikalik raqobatchilarni qo‘llab-quvvatlash sharoitida mahalliy firmalar raqobatbardoshligini yo‘qotib qo‘yishidan xavotirda, bunda zarar ko‘lami 400 milliard yevroni tashkil qiladi.
Avvalroq Stokholm YeI raisligining ustuvor yo‘nalishlari – xavfsizlik, barqaror rivojlanish, «yashil» energetikaga o‘tish va demokratik qadriyatlarni e’lon qilgan edi. «Shvetsiya Yevropa Ittifoqi kengashiga a’zo davlatlar va butun ittifoq uchun tarixiy muammolar yuzaga kelgan bir paytda raislikni o‘z zimmasiga olmoqda. Rossiyaning Ukrainaga noqonuniy, qabul qilib bo‘lmaydigan va asossiz bostirib kirishi Yevropa xavfsizligiga tahdid bo‘lib, u migratsiya, shuningdek, global oziq-ovqat ta’minoti va energiya tashuvchilar uchun dahshatli oqibatlarga olib keladi», deb ma’lum qildi Skandinaviya mamlakati rasmiylari.
Stokholm fikricha, Ukrainadagi urush fonida ishonchli sheriklar, jumladan, kuchli transatlantik aloqalar bilan doimiy hamkorlikni ta’minlash zarur. Shvetsiya Kiyevga iqtisodiy va harbiy yordamni birinchi o‘ringa qo‘yishga, shuningdek, Ukrainani Yevropa Ittifoqiga kirish yo‘lida qo‘llab-quvvatlashga va’da berdi.
2009 yildagi muvaffaqiyatsiz tajribadan keyin ilk bor Yevropa Ittifoqi kengashiga raislik qilgan Chexiya nafaqat Ukrainani faol qo‘llab-quvvatladi, balki rossiyaliklarga Shengen vizalarini berishni cheklash masalasini Yevropa Ittifoqi kengashi muhokamasiga olib chiqdi. Ko‘p o‘tmay, Shengen zonasi mamlakatlari Rossiya bilan viza berishning soddalashtirilgan tartibi to‘g‘risida tuzilgan shartnomani bekor qildi.
Barqaror rivojlanish haqida gapirar ekan, Shvetsiya rasmiylari Ukrainadagi urush va Rossiya tomonidan energiya ta’minotida davom etayotgan manipulyatsiya Yevropa iqtisodiyotiga jiddiy ta’sir ko‘rsatganini ta’kidladi. Biroq, bu Yevropa Ittifoqini yanada ekologik toza iqtisodiy rivojlanish variantlariga o‘tish yo‘lida to‘xtatmasligi kerak, deya ma’lum qildi rasmiy Stokholm.
