Toshkent shahar hokimi sovuq ob-havo tufayli mutasaddilarga maxsus topshiriqlar berdi

Toshkent shahar hokimi Jahongir Ortiqxo‘jayev o‘z o‘rinbosarlari va qator idoralar boshliqlari ishtirokida yig‘ilish o‘tkazdi. 

Unda Toshkent shahriga keskin sovuq ob-havoning kirib kelishi munosabati bilan har qanday talafotning oldini olish bo‘yicha tegishli topshiriqlar berildi. Jumladan: 

— anomal sovuq 9-18 yanvar kunlarida shahar va tuman hokimliklarida, boshqarmalar va ularning tuman bo‘limlarida har qanday majlislar (jumladan onlayn shaklida), tadbirlar, mas’ullarni asosiy faoliyatidan chalg‘ituvchi boshqa yig‘ilishlarni o‘tkazish taqiqlanadi;

— vaziyatlarni boshqarish yuzasidan topshiriqlar telefon va onlayn aloqa tizimlari orqali to‘g‘ridan-to‘g‘ri beriladi;

— qolipli non ishlab chiqaruvchilarga gaz va elektr energiyasi uzluksiz yetkazib berilishi nazoratga olinadi;

— oziq-ovqat ishlab chiqaruvchi korxonalarning uzluksiz ishlashi ta’minlanadi;

— shahar jamoat transportining tizimli ishlashi choralari ko‘riladi;

— markaziy va ichki yo‘llarni tezkorlik bilan qor va muzlamalardan tozalash tashkil qilinadi;

— boshqaruv servis kompaniyalari tomonidan ko‘pqavatli uylar yo‘laklarini qor va muzlamalardan o‘z vaqtida tozalash ta’minlanadi;

— elektr tizimida avariyalar tezkor bartaraf etiladi;

— tug‘ruqxonalar, shifoxonalar, muruvvat va mehribonlik uylarining issiqlik ta’minoti alohida nazoratga olinadi, ulardagi elektr generatorlari yoqilg‘i bilan ta’minlanadi, to‘xtovsiz ishlashi uchun shay holatga keltiriladi;

— favqulodda vaziyatlar boshqarmasi tomonidan 2 kun muddatda jamoat joylarida yong‘in xavfsizligini ta’minlash bo‘yicha qayta ko‘rik-nazorat tadbirlari o‘tkazilishi ta’minlanadi;

— aholining jamoat transportidan foydalanishiga keng imkoniyatlar yaratish va imkon qadar shaxsiy transport vositasidan foydalanmaslik tavsiya etiladi;

— navbatchilik, shtablar va call-markazlar faoliyatidagi aloqa telefonlarining uzluksiz ishlashi nazoratga olinadi;

— 2 kun muddatda 103 tez tibbiy yordam mashinalarini tibbiy anjom va dori vositalari bilan ta’minlanganlik darajasini ko‘zdan kechirib, yetishmovchiliklar to‘ldiriladi;

— ko‘chada xizmat qilayotgan yo‘l harakati xavfsizligi xizmati va obodonlashtirish xodimlari issiq choy va yegulik, ixcham termos idishlari bilan ta’minlanadi.