Ayrim maktablarda darslar onlayn bo‘ladi

Maktabgacha va maktab ta’limi vazirligi issiqlik ta’minotida muammosi bo‘lgan maktablar holat yaxshilanguniga qadar o‘qishni vaqtincha masofadan olib borishiga ruxsat berilishini ma’lum qildi. 

«Maktabgacha va maktab ta’limi vazirligi Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari tomonidan 23 yanvardan barcha hududlarda III chorak darslari boshlanishini ma’lum qiladi.

Bunda issiqlik ta’minotida muammosi bo‘lgan maktablar holat yaxshilanguniga qadar o‘qishni vaqtincha masofadan olib borishlariga ruxsat etiladi.

Qaysi maktablar vaqtincha masofadan ta’lim olishlari haqida hududlarning ijtimoiy tarmoq kanallari hamda maktab rahbarlari tomonidan bevosita ota-onalarga xabar beriladi», deyiladi vazirlik xabarida.

Yuqorida keltirilgan masalalar yuzasidan murojaatlarni @xtv_nazorat_bot orqali yuborish mumkin.

Chilonzor tumani hokimligi quyidagi 10 ta maktab an’anaviy tarzda ochilishi rejalashtirilganini ma’lum qildi: 126, 217, 90, 103, 128, 66, 131, 164, 195 va 200-maktab.

Onlayn tarzda mashg‘ulotlar olib boriladigan 22 ta maktablar quyidagilar: 101, 201, 270, 280, 281, 138, 162, 163, 168, 79, 173, 178, 179, 181, 182, 183, 184, 114, 188, 202, 232 va 4-maktab.