Ukrainalik jurnalist Yuriy Nikolov mamlakat armiyasi harbiylar uchun oziq-ovqat mahsulotlarini Kiyevdagi do‘konlardagiga qaraganda 2-3 baravar qimmatga sotib olayotgani haqida surishtiruv e’lon qildi. «Nashi dengi» (bizning pullar) loyihasi muallifining bu surishtiruvi shov-shuvga sabab bo‘ldi.
358 million dollarlik shartnoma
21 yanvar kuni jurnalist «Zerkalo nedeli» saytida Ukraina qurolli kuchlaridagi manbasidan olganini aytgan hujjatlarni e’lon qildi. Unda 2023 yil uchun Ukrainaning Kiyev, Jitomir, Chernihiv, Cherkass, Sumi va Poltava oblastlaridagi harbiy qismlari uchun sotib olingan mahsulotlar va ularning narxi keltirilgan. Unda aytilishicha, 13,16 milliard grivnalik (358 million dollar) shartnoma 23 dekabr kuni imzolangan.
Jurnalist hujjatdagi narxlarni Kiyevdagi «Silpo» do‘konidagi narxlar bilan taqqoslagan. Masalan, bu do‘konda tuxumning bir donasi 7 grivnaga sotilayotgan bir vaqtda Ukraina qurolli kuchlari tuzgani aytilayotgan hujjatda tuxumning donasi 17 grivnadan (5200 so‘m) sotib olinishi belgilangan. Yuqoridagi do‘konda kilosi 8 grivna turgan kartoshka hujjatda 22 grivna, do‘konda kilosi 80 grivnaga baholangan tovuq oyoqchalari shartnomada 120 grivnadan ko‘rsatilgan.
«Biz hali tadbirkor o‘z foydasini qo‘shgan chakana savdodagi narx bilan solishtirdik. Ulgurji narxlar bundan ham pastroq. Hujjatni ko‘rganlar mahsulotlar va xizmatlar degan joyini ko‘rib, bu xizmatlar ham qo‘shilgan narxdir deb o‘ylayotgan bo‘lishi mumkin, lekin unday emas. Shartnomada xizmat ko‘rsatish uchun alohida 30 million grivnalik band ham bor», deyiladi surishtiruvda.
Tarqalgan hujjatni Ukraina mudofaa vazirligi davlat xaridlari departamenti rahbari Bogdan Xmelnitskiy imzolagan. Bu inson avvalroq ham harbiy amunitsiya sotib olishda 580 ming dollarni talon-toroj qilishda gumonlangan.
Rasmiylar nima dedi?
Ukraina parlamentining Milliy xavfsizlik, mudofaa va razvedka qo‘mitasi vakili Maryana Bezuglayaning aytishicha, bu holat bo‘yicha davlat audit xizmati Mudofaa vazirligini tekshirishni boshlagan. Ukraina mudofaa vaziri Aleksey Reznikov esa Radaga chaqirilgan.
22 yanvar kuni Ukraina mudofaa vazirligi ushbu surishtiruvga aniq inkor etuvchi faktlar keltirmagan holda javob qaytardi va bunday surishtiruvlar «odamlarni chalg‘itishi»ni iddao qildi. Shuningdek, vazirlik bu borada surishtiruv o‘tkazishini so‘rab, Ukraina xavfsizlik xizmatiga murojaat qilinishini ma’lum qilgan.
«Mudofaa vazirligi korrupsiya holatlariga yo‘l qo‘ymaslik prinsipida sobitdir. Jamoatchilik orasida rezonans keltirib chiqargan holat bo‘yicha xizmat tekshiruvi o‘tkazilishini ma’lum qilamiz. Aybdorlar aniqlangan taqdirda ular jazosiz qolmaydi», deyiladi vazirlik bayonotida.
Zelenskiy nima dedi?
Bu holatga Ukraina prezidenti Volodimir Zelenskiy ham munosabat bildirdi. 23 yanvardagi murojaatida Zelenskiy jamoatchilik aniq ma’lumotni olishi, davlat esa keskin qadamlar tashlashini aytdi.
«Buni hamma bilib olishini xohlayman, qachonlardir bo‘lgan, ba’zi hukumatga yaqin odamlar o‘rgangan, kimlardir pogoni va kreslosiga ishongan hayotga qaytmaymiz», dedi Ukraina prezidenti.
Ukraina prezidenti bu borada gapirar ekan, qonunni himoya qilayotgan organ xodimlariga va «hamma narsani fahmlay oladigan» jurnalistlarga minnatdorchilik bildirgan.
