Ukrainada shov-shuvli iste’folar to‘lqini: prezident ofisidan mudofaa vazirligigacha. Kim nima uchun ishdan ketdi?

Ukraina prezidenti Volodimir Zelenskiy birinchi bo‘lib prezident ofisi rahbari o‘rinbosari Kirilo Timoshenkoni iste’foga chiqardi.

Timoshenko «o‘z xohishiga ko‘ra ishdan bo‘shash» to‘g‘risida ariza yozgan.

«Ukraina prezidenti Volodimir Zelenskiyga ishonch hamda har kuni va har daqiqada xayrli ishlar qilish imkoniyatini bergani uchun minnatdorchilik bildiraman», deya yozgan u telegram-kanalida.

Kirilo Timoshenko saylovdan oldingi prezidentlik kampaniyasi davridan buyon Zelenskiy jamoasida edi.

U 2019 yil 21 mayida prezident ofisi (o‘shanda bu tuzilma prezident administratsiyasi deb atalardi) rahbari o‘rinbosari lavozimini egallagandi.

Uning iste’foga chiqishining aniq sabablari hozircha ma’lum emas, ammo so‘nggi vaqtlarda u qator korrupsiya mojarolari figurantiga aylangandi.

Masalan, matbuotda uning ko‘chmas mulklari va qimmatbaho avtomobili bo‘yicha savollar paydo bo‘lgandi.

Timoshenko urushdan oldin ham, hukumat tashabbusi bilan boshlangan «Bolshaya stroyka» («Katta qurilish») strategik taraqqiyot dasturini nazorat qilganida budjet mablag‘larini o‘z manfaatlari uchun sarflab yuborgani bo‘yicha tanqidlarga uchragandi.

Mudofaa vazirligidagi mojaro

Kunning ikkinchi yirik iste’fosi Ukraina qurolli kuchlari moddiy-texnik ta’minoti uchun mas’ul bo‘lgan Vyacheslav Shapovalov mudofaa vaziri o‘rinbosari lavozimidan ketishi bo‘ldi.

Uning iste’fosini mudofaa vaziri Oleksiy Reznikov qo‘llab-quvvatlagan.

Shapovalov oldingi chiziqdagi harbiylarning oziq-ovqatlari uchun xaridlar bo‘yicha mojaro fonida iste’foga chiqish haqida ariza yozdi.

O‘tgan shanba kuni Ukraina matbuotida mudofaa vazirligi harbiylar uchun oziq-ovqat mahsulotlarini bozor narxidan 2-3 barobar qimmat narxlarda xarid qilgani haqida jurnalistik surishtiruv paydo bo‘lgandi.

Shapovalov iste’fo to‘g‘risidagi arizasida jamoatchilikdagi jiddiy norozilik tufayli ketayotganini aytgan, ammo korrupsiya to‘g‘risidagi ayblovlarni Ukraina armiyasi ta’minoti mavzusi atrofidagi isbotsiz manipulyatsiyalar deb atagan.

Mudofaa vazirligi vazir o‘rinbosariga qo‘yilgan ayblovlarni asossiz deb atadi, biroq uning iste’fosi Yevropa va demokratik siyosat an’analariga munosib ish bo‘lib, mudofaa manfaatlari har qanday kabinet yoki lavozimlardan yuqori ekanini namoyish etishini ta’kidladi.

«Mudofaa vazirligi korrupsiyaga mutlaqo toqatsizlik tamoyiliga amal qiladi, demokratik nazoratni hurmat qiladi va vakolatli organlar tomonidan o‘tkaziladigan har qanday tekshiruvlarning mutlaq shaffofligini ta’minlaydi», deyilgan vazirlik bayonotida.

Vazirlik Vyacheslav Shapovalovning iste’fosi kabi mas’uliyatli qarorlar Ukraina hukumatiga jamiyat va xalqaro hamkorlar ishonchini saqlab qolishda yordam berishiga umid bildirgan.

Ta’tilga chiqqan rasmiy

Uchinchi yirik iste’fo Ukraina bosh prokurori o‘rinbosari Oleksiy Simonenko bilan bog‘liq.

Seshanba kuni mamlakat bosh prokurori Andrey Kostin uni o‘z xohishiga ko‘ra lavozimidan ozod etish to‘g‘risidagi farmonni imzoladi.

Mojaroga instagramdagi fotosuratlar sabab bo‘lgan, ularda Simonenko Ispaniyaning Marbele kurortida dam olayotgani tasvirlangan.

«Ukrainskaya pravda» nashri jurnalisti Mixaylo Tkach huquq-tartibot organlaridagi manbalariga tayanib ma’lumot berishicha, bosh prokuror o‘rinbosari 10 kun davomida xorijda ta’tilda bo‘lgan.

Qolaversa, Simonenko rafiqasi bilan Ispaniyaga lvivlik tadbirkor va deputat Grigoriy Kozlovskiyning qimmatbaho avtomobilida jo‘nab ketgan, unga qo‘riqchi hamrohlik qilgan.

Bir kun oldin Ukraina prezidenti Volodimir Zelenskiy o‘z murojaatida bundan buyon ukrainalik amaldorlar davlat ishidan tashqari maqsadlarda xorijga chiqa olmasligini aytgandi.

Regionlardagi iste’folar

Shu kuni beshta oblast ma’muriyatida rahbarlar iste’foga chiqarildi:

• Dnipropetrovsk oblasti harbiy ma’muriyati rahbari Valentin Reznichenko
• Zaporijjya oblasti harbiy ma’muriyati rahbari Oleksandr Starux
• Kiyev oblasti harbiy ma’muriyati rahbari Oleksiy Kuleba
• Sumi oblasti harbiy ma’muriyati rahbari Dmitro Jivitskiy
• Xerson oblasti harbiy ma’muriyati rahbari Yaroslav Yanushevich

Ishdan bo‘shatilgan rahbarlar orasida eng tajribalisi - Dnipropetrovsk oblasti rahbari Valentin Reznichenkodir. U oblastni Petro Poroshenko davrida ham boshqarardi.

Xuddi Kirilo Timoshenko kabi u ham bir necha bor «Bolshaya stroitelstvo» loyihasi bilan bog‘liq mojarolarga duch kelgan.

2022 yil kuzida OAV regiondagi yirik qurilish pudratlaridan birini Reznichenkoga yaqin bo‘lgan shaxs qo‘lga kiritgan bo‘lishi mumkinligi haqida yozgandi.

O‘shanda aksilkorrupsiya organlari tekshiruv boshlagan va oblastda tintuvlar o‘tkazilgan, ammo hukumat bu ayblovlarga jiddiy e’tibor qaratmagandi.

Bugungi kunga qadar Oleksandr Starux rahbarlik qilib kelgan Zaporijjyada esa rahbariyat gumanitar yordamni talon-toroj qilgani bo‘yicha ish tekshirilmoqda.

Sumi oblasti rahbari Dmitro Jivitskiy ham so‘nggi oylarda qurilish uchun ajratilgan mablag‘larni taqsimlash bo‘yicha mojarolarga aralashib qolgan, shuningdek o‘z maslahatchisiga xorijga chiqishga ruxsat bergandi.

Xerson oblastining ishdan bo‘shatilgan rahbari Yaroslav Yanushevich bu lavozimni eng qisqa vaqt egallagan rahbar bo‘ldi - u avgust oyida, Ukraina qurolli kuchlari Xersonni qaytarib olish uchun qarshi hujum boshlagan vaqtda lavozimga tayinlangandi. Uning manziliga to‘g‘ridan to‘g‘ri korrupsiya bo‘yicha ayblovlar bildirilmagan, ammo mahalliy faollar uni deokkupatsiyadan keyin Xersonni tiklash ishlariga yetarlicha jiddiy yondashmayotganlikda ayblashgan.

Hukumat Kiyev oblasti harbiy ma’muriyati rahbari Oleksiy Kulebani ham ishdan oldi. Ammo ekspertlar prognozlariga ko‘ra, u prezident ofisida Timoshenkoning o‘rnini egallashi mumkin.