«Biz bir-birimizga emas, Rossiyaga qarshi urush olib bormoqdamiz», deb ma’lum qildi Germaniya tashqi ishlar vaziri YeKPAdagi nutqida. Keyinchalik vazirlik Annalena Berbok nimani nazarda tutganini tushuntirdi.
Germaniya TIV tashqi ishlar vaziri Annalena Berbokning 24 yanvar kuni Yevropa kengashi parlament assambleyasi (YeKPA) yig‘ilishidagi: «Biz bir-birimizga emas, Rossiyaga qarshi urush olib bormoqdamiz», degan rezonansli bayonotiga izoh berdi. 26 yanvar, payshanba kuni Germaniyaning Bild gazetasi: «Germaniya Tashqi ishlar vazirligi rahbarining bu gapi jahon ommaviy axborot vositalarida bir zumda tarqalib, hayrat va tanqidga sabab bo‘ldi», deb yozdi. Nashr Germaniya hukumatining pozitsiyasi Berbokning so‘zlariga qarama-qarshi ekanini bildirdi: kansler Olaf Shols Germaniya urush ishtirokchisiga aylanmasligi kerakligini bir necha bor aytgan. Nashr so‘roviga javoban Germaniya Tashqi ishlar vazirligi Annalena Berbokning iborasiga aniqlik kiritdi.
«Rossiya Ukrainaga qarshi shafqatsiz urush olib bormoqda. Bu Yevropa dunyo tartibi va xalqaro huquqqa qarshi ham urushdir. 24 yanvar kuni Yevropa kengashi parlament assambleyasi a’zolari bilan bo‘lib o‘tgan uchrashuvda tashqi ishlar vaziri Berbok Yevropa birgalikda bu urushga qarshi turishi kerakligini ta’kidladi», deyiladi vazirlik javobida.
«Xalqaro huquq bir ma’noli, - deb ta’kidlanadi izohda. - Ukrainaning Rossiya tajovuzkor urushiga qarshi BMT Nizomida mustahkamlangan o‘zini o‘zi himoya qilish shaxsiy huquqini amalga oshirishda qo‘llab-quvvatlash Germaniyani mojaro ishtirokchisiga aylantirmaydi». «Ehtimol, Tashqi ishlar vazirligining rasmiy javobidagi so‘nggi ibora Annalena Berbok o‘z bayonotida biroz qizishib ketganidan dalolat beradi», deb ta’kidladi Bild gazetasi.
25 yanvar kuni Germaniya kansleri Olaf Shols Ukrainaga Leopard 2 tanklarini yetkazib berishni ma’qulladi va bu qaror Germaniya ittifoqchilari bilan «kelishuv va yaqin hamkorlikda» qabul qilinganini ta’kidladi. Kansler, uning so‘zlariga ko‘ra, «Ukrainadagi urushning Rossiya va NATO o‘rtasidagi urushga aylanib ketishining oldini olishga imkon beruvchi» tamoyilga Germaniya hukumati kelajakda ham amal qilishiga ishontirdi.
