Serbiya prezidenti: Biz G‘arb bosimi tufayli Rossiyaga qarshi sanksiyalar kiritishga majburmiz

Serbiya prezidenti Aleksandr Vuchich G‘arbning bosimi tufayli Rossiyaga qarshi sanksiyalar joriy etilishi mumkinligini aytdi. Bu haqda RT kanali xabar berdi. 

«G‘arbning kuchli bosimi tufayli Serbiya Rossiyaga qarshi sanksiyalar qo‘llashga majbur bo‘lmoqda. Tez orada buni amalga oshiradigan vaqt yetib keladi», dedi Serbiya rahbari. 

Vuchich o‘ziga vaqt kerakligini qo‘shimcha qildi. Uning so‘zlariga ko‘ra, u «qulay paytni poylamoqda» va bu vaqt yaqinlashib kelyapti. Prezident Rossiyaga qarshi qanday sanksiyalar kiritilishini aytmadi. 

Avvalroq, Vuchich dunyo Ikkinchi jahon urushidan beri eng katta inqirozga duch kelishini, Ukrainadagi eng katta inqiroz yaqin besh-olti oy ichida kutilayotganini aytgan edi. Uning fikricha, yaqin kelajakda ziddiyat faqat yomonlashadi va kengayadi, keyin esa nazorat qilib bo‘lmaydigan holga keladi. Serbiya rahbarining fikricha, Kiyevga tanklar yetkazib berish qaroridan so‘ng G‘arb davlatlari Ukraina armiyasini F-16 samolyotlari bilan ta’minlaydi. 

Avvalroq, Aleksandr Vuchich Serbiya G‘arb va Rossiya o‘rtasida xuddi bolg‘a va sandon orasiga tushib qolgandek bo‘lishi mumkinligini aytgan edi. 

Serbiya shu vaqtga qadar G‘arb tomonidan Rossiyaga qarshi qo‘llanayotgan sanksiyalarga qo‘shilishdan bosh tortib kelayotgan edi.