Toshkentda qizlar ommaviy ravishda yo‘qolayotgani haqidagi xabar rad etildi

O‘zbek tilidagi qator Telegram-kanallarda Toshkentda qizlar yo‘qola boshlagani haqida xabarlar tarqalmoqda. Kun.uz masalaga oydinlik kiritish uchun IIV axborot xizmati bilan bog‘landi.

Ichki ishlar vazirining matbuot kotibi Shoxruh G‘iyosovga ko‘ra, Telegram messenjerida tarqalgan qizlarning g‘oyib bo‘layotgani haqidagi xabarlar go‘yoki bu voqealar bir-biri bilan uzviy bog‘liqdek tasavvur uyg‘otsa-da, haqiqatga to‘g‘ri kelmaydi. Buni qizlarning turli kunlarda, turli joylarda g‘oyib bo‘lgani ham tasdiqlaydi.

“Balog‘at yoshiga qadam qo‘yayotgan o‘smirlarda uydagilari bilan chiqishmay qolish yoki oilasidagilarga jahl qilib buva-buvisinikiga, dugonasinikiga yoki boshqa qarindoshlarinikiga ketib qolish tez-tez kuzatilib turadi. Bu bilan bunday xabarlarga loqaydmiz demoqchi emasman. Bu kabi xabarlar tarqalishi bilan nazoratga olinadi va tegishli xizmatlar yordamida surishtiruvlar o‘tkaziladi. Hozircha qizlarning yo‘qolgani haqida ijtimoiy tarmoqlarda tarqalgan xabarlarning birortasi tasdig‘ini topgani yo‘q. Chunki ularning hammasi yo‘qolgani haqida 102 ga ariza kelib tushgan kuni yo ertasiga tezkor xodimlar tomonidan topilgan”, deydi Shoxruh G‘iyosov.

Vazirning matbuot kotibi kimlardir turli vaqtlarda yo‘qolgan qizlar haqidagi xabarlarni turli joylardan olib umumlashtirgan va voqelikka vahimali tus berishga, bu orqali aholi orasida sarosima tarqatishga uringan.

IIV mulozimi ushbu xabarlar ortidan 102 qisqa raqamiga murojaatlar ko‘payib ketganini ta’kidlarkan, Telegram-kanallari ma’murlaridan har bir axborotni tekshirib, so‘ng e’lon qilishni, tekshirilmagan va haqiqatga to‘g‘ri kelmaydigan axborotni tarqatganlik uchun javobgarlik borligini eslatib o‘tdi.