Amerikaning yadro quroli olib yura oladigan bombardimonchisi Sankt-Peterburg tomon uchib manyovr qildi

Amerikaning NOBLE61 laqabli B-52 Stratofortress strategik bombardimonchi samolyoti Boltiq dengizi ustida manyovr qilib, Sankt-Peterburgga 200 kilometrgacha yaqinlashdi. Bu haqda RBK FlightRadar24 ma’lumotlariga asoslanib xabar tarqatgan.

Servisga ko‘ra, odatiy o‘q-dorilardan tashqari yadro qurolini ham olib yurishga qodir bo‘lgan bu samolyot Polsha hududidan parvoz qilib, Boltiq dengizi uzra uchgan va Estoniyaning Saaremaa oroli yaqinida Sankt-Peterburg tomon burilgan. Samolyot Rossiyaning Gogland oroli atrofida yo‘nalishni o‘zgartirgan, shundan keyin Estoniya, Latviya va Litva uzra uchib, Buyuk Britaniya tomon uchib ketgan.

Polsha mudofaa vaziri Mariush Blashchak bombardimonchi samolyot manyovriga izoh bergan. U tvitterdagi sahifasida B-52 Polshaning qiruvchi samolyotlari hamrohligida harakatlanganini aytgan, shuningdek bu parvoz «operativ muvofiqlik bo‘yicha mashg‘ulotlarning muhim elementi» bo‘lganini qo‘shimcha qilgan. «Biz birgalikda NATO sharqiy qanoti xavfsizligi uchun qayg‘uramiz», – degan u.

O‘z navbatida Finlandiyadagi xalqaro munosabatlar instituti direktori Mika Aaltola bombardimonchining parvozi «Rossiya tomonidan kuchaygan provokatsiya»ga javob hisoblanishini aytgan.

Peterburgdagi «Fontanka» nashri manbasi Boltiq floti navbatchi kuchlari amerikaliklar bombardimonchisi parvozi haqida xabardor bo‘lgani va uni parvoz davomida kuzatib turgani haqida xabar bergan. «Zarurat tug‘ilsa zudlik bilan javob qaytarishga tayyor turilgandi», – degan manba.

RF mudofaa vazirligi vaziyat yuzasidan munosabat bildirmagan.

• B-52 bombardimonchilari yadro qurolidan xoli qilingan bo‘ladi. Shunga qaramay, Stokholm xalqaro tinchlik tadqiqotlari instituti (SIPRI) va Amerika olimlari federatsiyasi (FAS) yadro qurollari bo‘yicha eksperti Xans Kristensenning hisoblashicha, Boltiq dengizi ustidan yadroviy qurol olib yurishga qodir 42 ta V-52 samolyotlaridan biri uchib o‘tgan.
• O‘tgan yil dekabrida Amerikaning Northrop Grumman harbiy-sanoat kompaniyasi so‘nggi B-21 Raider bombardimonchi samolyotining fotosuratlari va videosini namoyish etgandi. Ishlab chiqaruvchilar uni AQSh aviatsiyasining kelajakdagi tayanchi deb atagan. Bu dunyodagi ilk oltinchi avlod samolyoti bo‘lib, oddiy va yadroviy qurollarni olib yurishga qodir bo‘lgan yuqori texnologiyali stels-bombardimonchidir.
• Ishlab chiqaruvchilar tasdiqlashicha, u «dushmanning havo hujumidan mudofaa tizimiga yorib kirib, dunyoning istalgan nuqtasidagi nishonlarga zarba bera oladi», AQShning hozirgi floti bombardimonchilarining 90 foizida bunday imkoniyat yo‘q. Reuters agentligi qayd etishicha, uchish apparati maxfiy harakatlana oladi va «uchar qanotlar» sxemasida yaratilgan bo‘lib, bu uni o‘zidan oldingi B-2 samolyoti bilan o‘xshash qiladi.
• Kompaniya va AQSh mudofaa vazirligi o‘rtasida bunday samolyotni ishlab chiqish bo‘yicha shartnoma 2015 yilda tuzilgan. Loyiha ustida 40 shtatda 8 mingdan ortiq kishi 400 dan ortiq yetkazib beruvchi ishlagan. AQSh harbiy havo kuchlari bunday samolyotlardan kamida yuztasiga ega bo‘lishni rejalashtirgan. Bir dona samolyot narxi 750 mln dollarni tashkil etadi.