Zelenskiy Putinga «qolgan kunlarini yerto‘lada o‘tkazishni va hojatxona o‘rniga chelak ishlatish»ni tiladi

Ukraina prezidenti Volodimir Zelenskiy Rossiya prezidenti Vladimir Putinga «qolgan kunlarini yerto‘lada o‘tkazishni, hojatxona o‘rniga chelak ishlatishni» tiladi. 

UNIAN xabariga ko‘ra, bu haqda Zelenskiy Chernihiv oblastining Yagidne qishlog‘iga tashrifi chog‘ida, rus bosqinchilari 2022 yil 3 martdan 30 martgacha 367 nafar tinch aholini antisanitariya sharoitida saqlagan maktab yerto‘lasida aytdi. 

«Bularning barchasini ko‘rib, men Rossiya prezidentiga qolgan kunlarini yerto‘lada o‘tkazishni va hojatxona o‘rniga chelak ishlatishni tilayman», dedi Zelenskiy. 

Ukraina rahbari armiyaning qarshi hujumi haqida ham fikr bildirdi.

«Rus askarlarida chiqib ketishga vaqti bor, aks holda ularni yo‘q qilamiz», dedi u.

Rus harbiylari Yagidne qishlog‘idagi maktab yerto‘lasida 2022 yil 3 martdan 30 martgacha 367 nafar tinch aholini antisanitariya sharoitida, suv va ovqatsiz saqlagan. Garovga olinganlar orasida 50 nafar bola, jumladan bir necha go‘dak ham bor edi. Ularning eng kichigi bir yarim oylik edi. 11 kishi g‘ayriinsoniy sharoitlarga dosh berolmay vafot etgan. O‘n nafari rus bosqinchilari tomonidan otib tashlangan. 

Harbiy bosqin natijasida Yagidne qishlog‘idagi barcha 173 ta hovli zararlangan, ulardan 16 tasi vayron bo‘lgan. Bundan tashqari, kommunal mulk obektlari - madaniyat uyi va vrachlik punkti vayron qilingan. Maktab binosiga katta zarar yetgan. 

Chernihiv oblasti harbiy boshqarmasi boshlig‘i Vyacheslav Chaus so‘zlariga ko‘ra, o‘tgan yil davomida davlat va viloyat budjetidan mablag‘ ajratilishi, ko‘ngillilar tufayli, Latviya hukumati tomonidan qurilish materiallari va uylarni tiklash uchun mablag‘ ajratilgan. 100 dan ortiq uy ta’mirlangan.