Bayden Rossiyaga qarshi sanksiyalar muddatini bir yilga uzaytirdi 

AQSh prezidenti Jo Bayden ma’muriyatga rossiyalik jismoniy va yuridik shaxslarga nisbatan yangi sanksiyalar joriy etish imkoniyatini beruvchi farmonni bir yilga uzaytirdi. Bu haqda Oq uy saytida chop etilgan hujjatda aytiladi. 

«Rossiya hukumatining g‘arazli faoliyati AQSh milliy xavfsizligi, tashqi siyosati va iqtisodiyotiga o‘ta jiddiy xavf tug‘dirishda davom etmoqda», deyiladi hujjatda. 

Oq uy bunday tahdidlar qatorida «AQShda, shuningdek, uning ittifoqchilari va hamkorlarida erkin va demokratik saylovlar o‘tkazilishiga putur yetkazish», «kiber sohadagi zararli harakatlar», «transmilliy korrupsiyani rag‘batlantirish va xorij hukumatlariga ta’sir qilish uchun undan foydalanish» kabilarni sanab o‘tdi. 

2021 yil 15 aprelda Rossiya Federatsiyasining ayrim xavfli harakatlari milliy xavfsizlikka tahdid solishi munosabati bilan AQShda favqulodda holat e’lon qilingan 14024-sonli ijro qarori, 2022 yil 8 martda favqulodda holat ko‘lamini kengaytirish to‘g‘risida 14066-sonli farmon imzolangan edi. 

Oq uy favqulodda holatni 7 aprel kuni yana bir yilga uzaytirishga qaror qildi.