ChatGPT tufayli yo‘qolishi mumkin bo‘lgan 10 ta kasb sanab o‘tildi

ChatGPT chatboti bor-yo‘g‘i bir necha oydan beri mavjud, biroq u allaqachon texnologiya hamjamiyatida juda ko‘p shovqin yaratishga muvaffaq bo‘ldi. Mutaxassislarning ta’kidlashicha, ChatGPT va shunga o‘xshash sun’iy intellekt ishlanmalari ba’zi kasblarga tahdid solishi mumkin.

Business Insider portali mutaxassislari neyrotarmoqlarning rivojlanishi tufayli to‘liq yoki qisman yo‘qolib ketishi mumkin bo‘lgan 10 ta kasbni sanab o‘tishdi.

Ular quyidagilar:

- texnik vakansiyalar (koderlar, dasturchilar, dasturiy ta’minot muhandislari, ma’lumotlar tahlilchilari);

- ommaviy axborot vositalaridagi ish o‘rinlari (bosh direktor, muharrirlar, jurnalistlar);

- yuridik sohadagi ish o‘rinlari (parayurist, yurist yordamchisi);

- marketologlar;

- o‘qituvchilar;

- moliyaviy ish o‘rinlari (moliyaviy tahlilchilar, shaxsiy moliyaviy maslahatchilar);

- treyderlar,

- grafik dizaynerlar;

- buxgalterlar,

- qo‘llab-quvvatlash xizmati xodimlari.

2013 yilda Oksford universitetida o‘tkazilgan tadqiqotga ko‘ra, keyingi 20 yil ichida AI (sun’iy intellekt) tufayli Amerikadagi ish o‘rinlarining 47 foizi qisqartirilishi mumkinligi aytilgan edi. Ammo Goldman Sachs tadqiqoti shuni ko‘rsatdiki, generativ sun’iy intellekt dunyo bo‘ylab 300 million xodimni turli darajalarda almashtirishi mumkin, bu esa mehnat bozorida «sezilarli uzilishlar»ga olib keladi.

Shu bilan birga, sun’iy intellekt sohasidagi ba’zi mutaxassislar sun’iy intellekt ish jarayonida yordam berishi mumkinligiga ishonishadi, ammo xatolar va kamchiliklarga yo‘l qo‘ymaslik uchun odam uni nazorat qilishi lozimligini aytishadi.

ChatGPT - bu bir necha oy ichida yuqori texnologiyali dunyoda ko‘p shov-shuvlarga sabab bo‘lgan chatbot. U oson va ishonchli tarzda murakkab savollarga javob bera oladi, shuningdek, buyruq bo‘yicha nasr, she’r yoki kompyuter kodini yoza oladi. U hatto o‘sish sur’ati bo‘yicha TikTok ijtimoiy tarmog‘ini ham ortda qoldira oldi.