AQSh Ukrainaga yangi yordam paketi to‘g‘risida e’lon qildi

AQSh prezidenti Jo Bayden ma’muriyati Ukrainaga yangi harbiy yordam ko‘rsatishini e’lon qildi. 19 aprel, chorshanba kuni Pentagon saytida xabar qilinganidek, 325 million dollarlik paketga HIMARS YaO‘RT o‘q-dorilari, 155 va 105 millimetrli artilleriya snaryadlari, TOW tankka qarshi boshqariladigan raketalar, AT-4 tankka qarshi tizimlari, tank minalari, to‘siqlarni yengib o‘tish uchun o‘q-dorilar, 9 milliondan ortiq o‘qotar qurol patronlari, aniq boshqariladigan aviatsiya o‘q-dorilari, port va bandargohlarni qo‘riqlash uskunalari hamda boshqa jihozlar kiradi.

Ushbu harbiy yordam paketi Rossiyaning Ukrainaga qarshi keng ko‘lamli tajovuzkorligi boshlanganidan beri ketma-ket 36-yordam bo‘ldi. Pentagon aniqlik kiritishicha, 2022 yil fevralidan beri AQShning Ukrainaga bergan harbiy yordami umumiy miqdori 35,4 milliard dollarga yetgan.

Pentagon 4 aprel kuni AQShning Ukrainaga 2,6 milliard dollarlik harbiy yordam ko‘rsatishi haqida ma’lum qildi. U Patriot zenit-raketa tizimlari va HIMARS raketa tizimlari uchun o‘q-dorilar, 23 million patronlar, havo kuzatuvi radarlari, tankka qarshi va minomyotlarga qarshi tizimlar hamda o‘q-dorilarni o‘z ichiga olgan.