Xavf Qozog‘iston Respublikasiga nisbatan ham, Qozog‘iston kompaniyalari va banklariga nisbatan ham ortib borayotgani aytildi.
AQSh Moliya vazirining moliyaviy jinoyatlar bo‘yicha yordamchisi Elizabet Rozenberg so‘zlariga ko‘ra, Rossiyaga qo‘yilgan cheklovlarni chetlab o‘tishga yordam berayotgan Qozog‘iston banklari va kompaniyalariga qarshi ikkilamchi sanksiyalar xavfi kuchaymoqda. U Ostonaga tashrifi chog‘ida shunday ogohlantirish berdi.
«Xavf Qozog‘iston Respublikasiga nisbatan ham, Qozog‘iston kompaniyalari va Qozog‘iston banklariga nisbatan ham ortib bormoqda. Biz Rossiya sanksiyalardan ham, eksport nazoratidan ham chetlab o‘tish uchun juda ko‘p harakat qilayotganini va ular bu sa’y-harakatlarda juda muvaffaqiyatli bo‘lganini jiddiy qabul qilishimiz kerak», dedi Rozenberg.
Uning ta’kidlashicha, AQSh tomoni qozog‘istonlik hamkasblari, hukumat va xususiy sektor vakillari bilan mavjud xavf-xatarlarni, «shuningdek, Rossiyaning sanksiyalardan qochishdagi yordami bilan bog‘liq holda yuzaga kelishi mumkin bo‘lgan oqibatlarni aniqlash maqsadida muloqot olib bormoqda».
Qozog‘iston Ukraina bosqini tufayli Rossiyaga qarshi joriy etilgan sanksiyalarni qo‘llab-quvvatlamadi. Shu bilan birga, Ostona Rossiyaga sanksiyalardan qochishga yordam bermasligini bir necha bor ta’kidlagan.
28 fevral kuni Qozog‘istonda Tashqi ishlar vaziri Muxtor Tleuberdi va AQSh Davlat kotibi Entoni Blinken o‘rtasida muzokaralar bo‘lib o‘tdi. Muzokaralar chog‘ida Tleuberdi respublikaning Rossiya iqtisodiyotiga qaramligini, shuningdek, Qozog‘iston Rossiyadan hech qanday tahdid ko‘rmayotganini ta’kidlagan edi.
