Namanganda qulab tushgan reklama banneri bir odamni jarohatladi. Holat prokuratura tomonidan tekshirilmoqda

1 may kuni ijtimoiy tarmoqlarda avtomobil yo‘li yoqasidagi reklama banneri bir erkakning ustiga qulab tushgani, hodisa guvohlari trotuarda harakatsiz yotgan jabrlanuvchiga yordam ko‘rsatish maqsadida tez tibbiy yordam xizmatiga qo‘ng‘iroq qilayotgani aks etgan video tarqalgandi.

Hodisaga oid boshqa bir videoda bannerning qulashidan Nexia-3 rusumidagi transport vositasi ham zararlangani ko‘rinadi.

“Banner bosib qolgan odam hozir kasalxonada, oyoq qo‘li sog‘. Lekin hushini yo‘qotgan. Agar uning oldida Nexia-3 mashinasi bo‘lmaganida, [qulagan banner] fuqaroning umriga zomin bo‘lar edi”, deyiladi “Namanganliklar” telegram-kanalida chiqqan xabarda.

Kun.uz muxbiri jabrlanuvchi banner qo‘porilib tushgan joyda mayda-chuyda sotib, tirikchilik qilishini aniqladi.

Guvohlar qulab tushgan reklama ustuni asosi atigi qirq santimetrlik betondan iborat ekani, chuqur kavlamasdan tuproq ustiga o‘rnatilgan poydevor kuchsiz shamol natijasida ustidagi og‘irlikni ko‘tara olmay yiqilib tushganiga e’tibor qaratishgan.

Bosh prokuratura matbuot kotibi Hayot Shamsiddinov ro‘y bergan holat yuzasida ma’lumot berdi.

“1 may kuni Namangan shahrida joylashgan reklama banneri fundamentidan o‘pirilib, yerga tushishi oqibatida bir nafar shaxs (erkak, 1997 y.t.) tan jarohati olgan va joyida hushini yo‘qotgan.

Shundan so‘ng, yon atrofda bo‘lgan fuqarolarning ko‘magida jabrlangan shaxs darhol shifoxonaga olib ketilgan. Mazkur holat yuzasidan tekshirish harakatlari olib borilmoqda”, deyiladi bayonotda.