Ukrainaning qarshi hujumi yaqin vaqt ichida boshlanishi mumkin - Zaporijjya oblastida evakuatsiya e’lon qilindi

Ukraina qurolli kuchlari yaqin kunlar yoki soatlar ichida Zaporijjya oblastida qarshi hujumini boshlashi mumkin. Bu haqda regionning anneksiya qilingan qismiga Rossiya tomonidan tayinlangan rahbari Yevgeniy Balitskiy «Solovev Live» efirida ma’lum qildi.

Yevgeniy Balitskiy front chizig‘iga yaqin joylashgan hududlar aholisining bir qismi ko‘chirilishi boshlanishini e’lon qildi.

Uning so‘zlariga ko‘ra, bolalar va ota-onalari, keksa yoshli kishilar va nogironligi bor kishilarni «dushman olovidan asrash»ga qaror qilingan.

Uning so‘zlariga ko‘ra, so‘nggi kunlarda raqib tomon harbiy tutashuv chizig‘iga yaqin joylashgan aholi yashash punktlarini o‘qqa tutishni kuchaytirgan.

Quyidagi 18 ta aholi yashash manzillari aholisini «ko‘chirish» ko‘zda tutilgan: Timoshovka, Smirnovo, Tarasovka, Orlyanskoye, Molochansk, Kuybishevo, Prishib, Tokmak, Malaya Belozerka, Vasilevka, Velikaya Belozerka, Dniprorudnoye, Mixaylovka, Kamenka-Dniprovskaya, Energodar, Pologi, Konskiye Razdori, Rozovka.

«Biz odamlarning xavfsizligi bilan tavakkal qila olmaymiz va uyushgan holda ketish uchun vositalar, bir martalik to‘lovlar, joy va yegulik bilan ta’minlaymiz. Vaqtincha joylar region ichida bo‘ladi», — degan Balitskiy.

Ma’lumotlarga ko‘ra, aholini Berdyansk shahriga joylashtirish rejalashtirilmoqda.