Bugun grin-karta natijalari chiqadi

Buning uchun AQSh Davlat departamentining lotereya uchun maxsus saytiga (www.dvprogram.state.gov) kirish hamda ariza topshirgan vaqtda saqlab olingan tasdiq raqamini (Confirmation number) kiritish kerak bo‘ladi.

Eslatib o‘tamiz, grin karta lotereyasida ishtirok barcha qatnashchilar uchun bepul hisoblanadi. Muayyan xarajatlar faqatgina tanlab olingan arizachilarda, viza olish bilan bog‘liq ravishda yuzaga keladi.

Rasmiy nomi “Xilma-xillik viza dasturi” (Diversity Visa Program) bo‘lgan grin-kartadan maqsad – tarixan Amerikaga migratsiya ko‘rsatkichlari kam bo‘lgan xalqlarga AQShga ko‘chib kelib yashash imkoniyatini berish, bu bilan AQSh jamiyatida millatlar xilma-xilligiga erishishdan iborat. Lotereyani har yili dunyo bo‘ylab Amerikaga ko‘chib ketishni istovchi o‘nlab million kishi o‘ynaydi. Ular orasida millionlab o‘zbekistonliklar ham bor.

O‘tgan yili eng ko‘p yutuq chiqqanlar orasida O‘zbekiston fuqarolari 3-o‘rinni olgandi. DV-2023 dasturida 119 262 arizachi tasodifiy tanlab olingan, ularning 5511 nafari o‘zbekistonliklar bo‘lgan. Bundan birozgina ko‘proq fuqarosiga omad kulib boqqan Misr va Jazoir birinchi va ikkinchi o‘rinlarni egallagan.

Lotereyada g‘olib chiqish AQShga viza olishni kafolatlamaydi. Buning uchun maxsus formani to‘ldirish, shuningdek, elchixonada suhbatdan o‘tish talab etiladi. Viza sohiblari AQShda muqim yashash, ishlash, shuningdek, Amerika fuqarolariga tegishli, saylash va saylanishdan boshqa deyarli barcha huquqlardan foydalanish imkoniyatini qo‘lga kiritadi. Belgilangan muddatdan so‘ng AQSh fuqaroligi uchun ariza topshirish ham mumkin bo‘ladi.