Argentinalik futbolchi «Barselona»ga ham qaytmaydi, «Al-Hilol»ga ham o‘tmaydi.
«PSJ» bilan shartnomasi muddati yakunlangan Lionel Messi Amerikaning «Inter Mayami» klubiga o‘tadi. Bu ma’lumotni taniqli ispaniyalik futbol jurnalisti Gilem Balaga BBC nashriga tasdiqlagan. Uning ma’lumotiga ko‘ra, argentinalik futbolchi Saudiya Arabistonining «Al-Hilol» klubining yiliga 400 mln yevrodan to‘lashni nazarda tutuvchi ikki yillik shartnoma bo‘yicha taklifini rad etgan.
Yana bir jurnalist Migel Rikoning aytishicha, Messi «Barselona» rahbariyatini klubga qaytmoqchi emasligi haqida xabardor qilgan.
Jurnalist Ernan Kastilo ham Messi afsonaviy futbolchi Devid Bekhemga tegishli bo‘lgan «Inter Mayami» klubiga o‘tishga rozilik bergani haqida yozgan. Amerikaliklar klubi u bilan uch yillik shartnoma imzolaydi.
Shu tariqa, u faoliyatida ilk bor Yevropadan tashqarida o‘ynaydigan bo‘lmoqda.
Lionel Messi Yevropada yana bir mavsum qolmoqchi edi, ammo yetarli darajada jozibador takliflarga ega bo‘lmadi – sobiq klubi «Barselona» moliyaviy muammolar va la ligadagi cheklovlar tufayli uni qaytara olmadi. Natijada unda faqat «Inter Mayami» va Saudiyaning «Al-Hilol» klublaridan birini tanlash varianti qolgandi.
Uning tanlovida Amerikadagi hayot tarzi, Floridadagi iqlim va bu yerda ko‘pchilik ispan tilida so‘zlashishi, shuningdek futbol doirasida yirik brendlar bilan kelishuvlar tuzish imkoniyati muhim ahamiyatga ega bo‘lgan.
Qolaversa, uning Mayamida uyi bor va hozirda ijaraga berilgan.
Amerika klubi bilan kelishuv Adidas va Apple kabi grandlar bilan shartnomalarni ham o‘z ichiga oladi. Nufuzli The Athletic nashri Messi MLS chempionatiga o‘tish orqali ega bo‘ladigan imtiyozlar haqida ma’lumot bergan:
- Messi Apple+ kompaniyasining MLS o‘yinlari va kontentini tomosha qilishni boshlagan yangi obunachilaridan foydadan ulush oladi;
- Messi adidas’ning ayrim mahsulotlari sotuvidan foyda ola boshlaydi;
- Messi futbolchilik faoliyatini yakunlaganidan keyin MLS chempionatidagi istalgan klubni xarid qilishi mumkin bo‘ladi.
Ayni vaqtda 35 yoshda bo‘lgan Lionel Messi yetti bor dunyoning eng yaxshi futbolchisiga beriladigan «Oltin to‘p»ni qo‘lga kiritgan va Argentina bilan jahon chempioni bo‘lgani tufayli u bu yil ham ushbu sovringa ega chiqishi kutilmoqda.
