Toshkent viloyati IIBB matbuot kotibi saytni yolg‘on tarqatishda aybladi, lekin asos qani?

Toshkent viloyati IIBBning mintaqaviy bo‘linmalaridan birining rahbari qamoqqa olingani, tintuv chog‘ida uning xizmat xonasidagi seyfidan 20 ming AQSh dollari chiqqani, u Bo‘stonliq tumanida profilaktika inspektorlariga ajratilgan xizmat uyini soxta hujjatlar orqali sotib yuborishda gumonlanayotgani haqida xabar bergan edik.

Xabarda, shuningdek, Olmaliq shahar IIB boshlig‘ining birinchi o‘rinbosariga biriktirilgan haydovchi fuqarodan 300 AQSh dollarini olgan vaqtda ushlangani, tergov davomida bu oldi-berdiga yana kimlar aralashganiga oydinlik kiritilishi kutilayotgani haqida so‘z boradi.

Bu xabarimiz Toshkent viloyati IIBB axborot xizmati rahbari Bobur To‘laganovni jig‘ibiyron qilgan ko‘rinadi. U mazkur xabarni “tekshirilmagan, haqiqatga to‘g‘ri kelmaydigan va asosiy qismi yolg‘on axborot” deb baholadi.

To‘g‘ri, xabarning dastlabki variantida manbamiz bergan ma’lumotlar chalkashtirib yuborilgani tufayli ikkita mintaqaviy hudud rahbari qamoqqa olingani aytilgandi va bu anglashilmovchilik qisqa fursat ichida bartaraf etildi. Ammo bu xabarning boshdan oyoq yolg‘on yoki mishmishlardan iboratligini anglatmaydi.

Agar xabar haqiqatga to‘g‘ri kelmasa, ya’ni Toshkent viloyati IIBB birinchi mintaqaviy hududi rahbari qamoqqa olingani feyk ma’lumot bo‘lsa, nima uchun ehtirosga to‘la bayonotda bu haqda lom-mim deyilmagan?

Vaholanki, xabarda bu mansabdor aynan qaysi qilmishlari uchun tezkor tadbir davomida hibs qilingani, dastlabki tergov davomida uning boshqa jinoiy qilmishlari ham aniqlangani bayon qilingandi, xo‘sh, bu ham yolg‘on bo‘lsa, to‘g‘ri ma’lumot qayerda? Uning xizmat xonasidan topilgan 20 ming dollar-chi, bu ham uydirmami?

Aslida, biror tashkilot yoki matbuot kotibi tomonidan beriladigan rasmiy munosabat, bayonot yoki raddiyada OAVda e’lon qilingan xabarda ko‘tarilgan masalalar bo‘yicha bandma-band munosabat bildirilishi, o‘rni kelganda zaruriy hujjatlar yoki video-foto dalillar taqdim etilishi lozim. Biroq aftidan Bobur To‘laganov kasbining asosi hisoblangan bu qoidalardan bexabar ko‘rinadi. Yo‘qsa, tahririyatni yolg‘on axborot tarqatganlikda ayblash, buning uchun uni javobgarlikka tortishni talab qilishdan avval asoslantirilgan raddiya bergan bo‘lardi.

Toshkent viloyati IIBB boshlig‘ining matbuot kotibi o‘z bayonotida tahririyatni ular bilan bog‘lanib, xabarda keltirilgan ma’lumotlarni faktcheking qilmaganlikda ayblagan. Biroq birinchidan, ma’lumot ishonchli ekani bir-biridan mustaqil ikki manba tomonidan tasdiqlangan. Qolaversa, tajriba shuni ko‘rsatadiki, matbuot kotiblari o‘zi xizmat qilayotgan tizimdagi korrupsion holatlar, yopdi-yopdi qilinayotgan jinoyatlarni iloji boricha ovoza qilmasliklari, basharti jurnalistlar bu haqda rasmiy ma’lumot so‘rashganda hech qanday munosabat bildirmasliklari odat tusiga kirgan. Vaholanki, ularga tashkilot rahbarining o‘rinbosariga teng maqom, maosh, vakolat va imtiyozlar tizimdagi ochiqlik va oshkoralikni ta’minlash uchun berilyapti. Biroq buning evaziga ular nima qilyapti? Yopiqlik qozon yopiqlik qolishi uchun jon-jahdi bilan kurashishmoqda.

Yo‘qsa, Toshkent viloyati IIBB rasmiy sahifalarida birinchi mintaqaviy hududi rahbari va Olmaliq shahar IIB boshlig‘i o‘rinbosarining haydovchisi bilan sodir bo‘lgan holatlarda voqea qaysi kuni sodir bo‘lgani, ular nimada gumonlanayotgani, qolgan tafsilotlarga tergov davomida aniqlik kiritilishi haqida qisqagina bo‘lsa-da axborot berib qo‘yishga, nima to‘sqinlik qilgan? Matbuot kotibining to‘g‘ridan to‘g‘ri vazifasi aslida shu emasmi?

Bobur To‘laganov “mendan bu haqda izoh so‘rashmadi” deya ayyuhannos solishdan avval shu paytgacha Kun.uz'dan tushgan so‘rovlarni nima uchun javobsiz qoldirib kelayotganiga oydinlik kiritsa yaxshi bo‘lardi. Jumladan, noma’lum erkak Olmaliqdagi masjidda odamlarning pul va telefonlarini o‘g‘irlab ketayotgani, Quyi Chirchiqdagi mudhish qotillikka uchastkavoyning ehtimoliy beparvoligi sabab bo‘lgani, Bo‘stonliqda bir ayolni kaltaklab, zo‘rlaganlikda gumonlanayotgan 4 erkakning tergovi yuzasidan izoh so‘rab qilgan murojaatlarimizga javob bo‘lmagan.

Albatta, tizimga doir salbiy ma’lumot chiqib ketsa, ayrim rahbarlar bor alamini matbuot kotibidan olishini eshitganmiz. Shu ma’noda ularga ham oson tutmaymiz. Ammo matbuot kotibi qachonki zimmasidagi vazifalarni qoyillatib bajarib qo‘ysa, “ishlarim ko‘p, vaqtim yo‘q, majlisda edim, hududda yurgandim” kabi vajlar bilan so‘rovlarni javobsiz qoldirmasa, jurnalistlar har qanday vaziyatda albatta unga qo‘ng‘iroq qilib, izoh olishdan qochishmaydi.

Umuman, Bo‘kadagi qiynoq oqibatida ro‘y bergan o‘lim yashirilgan kasalni isitmasi oshkor qilishini eslatib qo‘ydi. Kun.uz'ga yetib kelgan ma’lumotlar shuni ko‘rsatmoqdaki, viloyatda ichki ishlar tizimida ishlar to‘g‘ri yo‘lga qo‘yilmagan, noxush holatlar ortib ketgan. Bu haqdagi tahliliy maqolani tez fursatlarda saytimizda o‘qiysiz.

Jamshid Niyozov,
jurnalist