NATO sammitida Ukrainaga taklif masalasi muhokama qilinmaydi

NATOning iyul oyida Vilnyusda bo‘lib o‘tadigan sammitida uning a’zolari “taklifni emas, balki Ukrainani NATOga qanday yaqinlashtirishni muhokama qiladilar”, dedi tashkilot bosh kotibi Yyens Stoltenberg 16 iyun, juma kuni Bryusselda bo‘lib o‘tgan matbuot anjumanida.

Uning so‘zlariga ko‘ra, bu reja uchta elementdan iborat. Birinchisi, Ukrainani NATOga amaliy jihatdan yaqinlashtirish: unga Sovet standartlaridan G‘arb standartlariga o‘tishga yordam berish va alyans a’zolari armiyalari bilan o‘zaro hamkorlikni oshirish. Ikkinchi element - siyosiy. “Biz NATO-Ukraina kengashini tashkil etish bo‘yicha kelishuv tuzishga yaqinmiz, - dedi Stoltenberg. - Biz yangi kengashning birinchi yig‘ilishini Vilnyusda prezident Zelenskiy bilan o‘tkazishni maqsad qilganmiz”. Mavjud NATO-Ukraina komissiyasidan farqli o‘laroq, yangi kengash doirasida Ukraina ittifoqning boshqa mamlakatlari bilan bir xil huquqlarga va maslahatlashuvlar uchun bir xil imkoniyatlarga ega chiqadi. Bundan tashqari, ushbu organ qaror qabul qilish imkoniyatiga ega bo‘ladi, dedi bosh kotib.

Uchinchi element Ukrainaning NATOga qo‘shilishi bilan bog‘liq bo‘ladi. Aslida barcha ittifoqchilar mamlakat alyansga a’zo bo‘lishi kerak degan fikrga qo‘shiladi, dedi Stoltenberg. Uning so‘zlariga ko‘ra, NATOning bir qancha davlatlari Ukraina bilan bu yo‘nalishdagi ikki va ko‘p tomonlama loyihalarni muhokama qilmoqda. "Biz hammamiz bir fikrdamiz, so‘nggi o‘n yil ichida Ukraina allaqachon NATOga yaqinlashdi. Biz NATOga eshik ochiq ekanligiga rozimiz. Va Ukraina alyansga a’zo bo‘ladi. Bu qarorni ittifoqchilar va Ukraina qabul qilishi kerak. Rossiyada veto huquqi yo‘q”, - dedi u.

NATO bosh kotibi Kiyevga harbiy yordamni kuchaytirish muhimligini yana bir bor ta’kidladi va ittifoqchilarning yangi majburiyatlarini, shu jumladan Niderlandiya va Daniyaning Ukraina uchuvchilarini F-16 qiruvchi samolyotlarida o‘qitishni boshlash tashabbusini hamda Buyuk Britaniya va AQSh bilan birgalikda Ukrainaga qisqa va o‘rta masofaga mo‘ljallangan havo hujumidan mudofaa raketalarini yetkazib berish g‘oyasini olqishladi. U, shuningdek, ittifoqchilar NATOning keng qamrovli yordam paketi doirasida jami 500 million yevro miqdorida mablag‘ ajratganini aytdi.