НАТО саммитида Украинага таклиф масаласи муҳокама қилинмайди

НАТОнинг июл ойида Вилнюсда бўлиб ўтадиган саммитида унинг аъзолари “таклифни эмас, балки Украинани НАТОга қандай яқинлаштиришни муҳокама қиладилар”, деди ташкилот бош котиби Йенс Столтенберг 16 июн, жума куни Брюсселда бўлиб ўтган матбуот анжуманида.

Унинг сўзларига кўра, бу режа учта элементдан иборат. Биринчиси, Украинани НАТОга амалий жиҳатдан яқинлаштириш: унга Совет стандартларидан Ғарб стандартларига ўтишга ёрдам бериш ва алянс аъзолари армиялари билан ўзаро ҳамкорликни ошириш. Иккинчи элемент - сиёсий. “Биз НАТО-Украина кенгашини ташкил этиш бўйича келишув тузишга яқинмиз, - деди Столтенберг. - Биз янги кенгашнинг биринчи йиғилишини Вилнюсда президент Зеленский билан ўтказишни мақсад қилганмиз”. Мавжуд НАТО-Украина комиссиясидан фарқли ўлароқ, янги кенгаш доирасида Украина иттифоқнинг бошқа мамлакатлари билан бир хил ҳуқуқларга ва маслаҳатлашувлар учун бир хил имкониятларга эга чиқади. Бундан ташқари, ушбу орган қарор қабул қилиш имкониятига эга бўлади, деди бош котиб.

Учинчи элемент Украинанинг НАТОга қўшилиши билан боғлиқ бўлади. Аслида барча иттифоқчилар мамлакат алянсга аъзо бўлиши керак деган фикрга қўшилади, деди Столтенберг. Унинг сўзларига кўра, НАТОнинг бир қанча давлатлари Украина билан бу йўналишдаги икки ва кўп томонлама лойиҳаларни муҳокама қилмоқда. "Биз ҳаммамиз бир фикрдамиз, сўнгги ўн йил ичида Украина аллақачон НАТОга яқинлашди. Биз НАТОга эшик очиқ эканлигига розимиз. Ва Украина алянсга аъзо бўлади. Бу қарорни иттифоқчилар ва Украина қабул қилиши керак. Россияда вето ҳуқуқи йўқ”, - деди у.

НАТО бош котиби Киевга ҳарбий ёрдамни кучайтириш муҳимлигини яна бир бор таъкидлади ва иттифоқчиларнинг янги мажбуриятларини, шу жумладан Нидерландия ва Даниянинг Украина учувчиларини F-16 қирувчи самолётларида ўқитишни бошлаш ташаббусини ҳамда Буюк Британия ва АҚШ билан биргаликда Украинага қисқа ва ўрта масофага мўлжалланган ҳаво ҳужумидан мудофаа ракеталарини етказиб бериш ғоясини олқишлади. У, шунингдек, иттифоқчилар НАТОнинг кенг қамровли ёрдам пакети доирасида жами 500 миллион евро миқдорида маблағ ажратганини айтди.