Maskning onasi unga Tsukerberg bilan jang qilishni taqiqladi

Ilon Maskning onasi Mey Mask o‘g‘lining Meta kompaniyasi rahbari Mark Tsukerberg bilan MMA qoidalari bo‘yicha o‘tkazilishi rejalashtirilayotgan jangini bekor qilganini aytdi. Bu haqda u Twitter ijtimoiy tarmog‘ida yozdi.

«Aslida men jangni bekor qildim. Ammo hali ularga aytmadim. Har ehtimolga qarshi jang bekor qilinganini aytishda davom etaman...», dedi Mey Mask.

Avvalroq milliarderning onasi «so‘z bilan» jang qilishni taklif etgandi.

«Faqat so‘zlar yordamida kurashing. Kresloda o‘tirib. Bir-biringizdan bir metr masofada. Kim eng kulgili bo‘lsa, o‘sha g‘alaba qozonadi», deb yozdi u.

Ilon Mask onasining so‘zlariga hazilomuz tarzda munosabat bildirdi. «Onajon, bas qiling, baribir u bilan jang qilaman», deb yozdi u.

Twitter ijtimoiy tarmog‘ining egasi Ilon Mask 21 iyun kuni Facebook asoschisi Mark Tsukerbergni yakkama-yakka kurashga chaqirdi. Bunga Facebook tomonidan Twitter raqobatchisi ishlab chiqilayotgani haqidagi xabar sabab bo‘ldi. Tsukerberg uunga javoban: «Jang qayerda bo‘lishini yozib yubor» dedi. Mask Las-Vegasdagi mashhur UFC janglari o‘tkaziladigan zalni tanladi.

Keyinroq, Universal janglar chempionati (UFC) prezidenti Dana Uayt Mask va Tsukerberg bilan gaplashib olganini, ikkalasining niyati «jiddiy» ekanini aytdi.