FlyArystan Ostonadan Toshkentga parvozlarni yo‘lga qo‘ydi

Qozog‘istonning FlyArystan loukoster aviakompaniyasi Toshkent va Ostona o‘rtasida reyslarni yo‘lga qo‘ydi. Dastlabki reys bilan 180 nafar yo‘lovchi bugun, 3 iyul kuni Toshkent aeroportida qabul qilindi.

Aviakompaniya saytida xabar berilishicha, parvozlar haftasiga ikki marta — dushanba va chorshanba kunlari amalga oshiriladi.

FlyArystan Qozog‘istonning arzon aviatashuvchisi bo‘lib, shtab-kvartirasi Olmaotada joylashgan. Kompaniya Qozog‘istondagi eng yirik Air Astana aviakompaniyasi negizida tashkil etilgan. Loukoster 2019 yilning mayidan buyon yo‘lovchi tashish bilan shug‘ullanib kelmoqda.

FlyArystan aviakompaniyasi uzoq tanaffusdan so‘ng 18 mart kuni Olmaotadan Samarqandga parvozlarni qayta tiklagandi.

Air Astana rahbari Piter Foster FlyArystan aviakompaniyasining boshqa shaharlari – Buxoro, Xiva, Nukus, Qarshi, Andijon, Namangan va Farg‘onaga ham reyslarini yo‘lga qo‘yish rejalashtirilganini ma’lum qilgan.