Yaponiyada tishlar o‘sishini tiklaydigan dunyodagi birinchi dori yaratildi

Yaponiyalik tadqiqot guruhi odamlarga yangi tishlarni o‘stirishga imkon beruvchi ilg‘or dori yaratishda muvaffaqiyatga erishdi. Preparatning klinik sinovlari 2024 yilning iyulida boshlanishi kerak, deb yozdi Mainichi Shimbun. 

«Yangi tishlarni o‘stirish g‘oyasi har bir tish shifokorining orzusidir. Men aspiranturada o‘qiyotganimda bu borada ishlaganman. Men buni amalga oshirishimga ishonchim komil edi», dedi Katsu Takahashi, Osaka shahridagi Kitano tibbiyot tadqiqot instituti stomatologiya va og‘iz-jag‘ jarrohligi bo‘limi boshlig‘i. 

Dori tug‘ma omillar (anodontiya) tufayli ildiz tishlari to‘liq bo‘lmagan odamlar uchun mo‘ljallangan. Bu aholining taxminan 1 foizini tashkil qiladi. 

Yapon olimlari o‘z tadqiqotida maxsus genni aniqladi, uning yo‘qligi sichqonlarda tishlar sonining ko‘payishiga olib keldi. Ushbu gen tomonidan sintez qilinadigan USAG-1 oqsili tishlarning o‘sishini cheklagan. 

Takahashi tadqiqot guruhi oqsil funksiyasini blokirovka qilishga qodir neytrallashtiruvchi antitana ishlab chiqdi. 2018 yilda o‘tkazilgan tajribada tishlari tug‘ma kam bo‘lgan sichqonlarga yangi dori berildi, natijada tishlar o‘sib chiqdi. 

Tadqiqotchilar preparatni sassiqkuzanlarda sinab ko‘rishdi. Natijada, ularda qo‘shimcha yettinchi old tish o‘sib chiqdi. U mavjud bo‘lganlar orasida o‘sib, bir xil shaklga ega bo‘lgani sababli, olimlar preparat uchinchi avlod tishlarining shakllanishiga olib keladi deb xulosa qilishmoqda. 

Hozirda preparatni insonda sinab ko‘rish uchun tayyorgarlik ishlari olib borilmoqda. Uning organizmga zararli ta’siri yo‘qligi tasdiqlanishi bilanoq, anodontiya bilan og‘rigan 2 yoshdan 6 yoshgacha bo‘lgan bolalarni davolashga yo‘naltiriladi. 

Agar jarayon muvaffaqiyatli bo‘lsa, stomatologiya sohasida katta o‘zgarishga olib kelishi mumkin. Kariyes yoki tishlar eroziyasidan aziyat chekadiganlar yangi, uchinchi to‘plam tishlarini o‘stirish orqali protezlardan voz kechish imkoniyatiga ega bo‘ladi.