Rossiya sudi Jizzax akkumulyator zavodiga qariyb 2,8 mln dollarlik tovon to‘lash majburiyatini yukladi

Jizzax akkumulyator zavodi Rossiyada intellektual mulk huquqini buzgani uchun qariyb 2,8 mln dollar jarima to‘lashi belgilandi. Bu haqda “Kommersant’” xabar berdi.

Zavod bir necha yildan beri Rossiyaga “KUCH” brendi ostidagi akkumulyatorlarni eksport qilib keladi. Qrimlik tadbirkor Artem Paliychuk sudga murojaat qilib, “Jizzax akkumulyator zavodi” AJ va Rostovda faoliyat yurituvchi “ARS Motors” MChJ unga tegishli “KUCH” savdo belgisidan noqonuniy tarzda foydalanib kelayotganini iddao qiladi va uning foydasiga Jizzaxdagi zavoddan 257,3 mln rubl (2,84 mln dollar) tovon puli undirilishini talab qiladi.

Jizzax akkumulyator zavodi o‘z mahsulotlarini “KUCH” savdo belgisi ostida og‘ir yuk avtomobillari ishlab chiqaruvchi Tataristondagi “KAMAZ” AJga yetkazib bergan. Bu tovar ayirboshlash 2019 yildan 2022 yilgacha amalga oshirilgan operatsiyalar to‘g‘risidagi bojxona ma’lumotlarida ham keltirilgan.

2023 yilning 3 aprel kuni Qrim arbitraj sudida ushbu ish ko‘rib chiqilib, da’vogarning da’vo arizasini qanoatlantirish haqida qaror qabul qilingandi. O‘zbekistondagi zavod esa birinchi instansiya sudining qaroridan norozi bo‘lgan va yuqori instansiya sudiga apellyatsiya shikoyati kiritgan. Kompaniya O‘zbekistonda ro‘yxatdan o‘tgani va Rossiya yurisdiksiyasiga bo‘ysunmasligiga ishora qilgan. Lekin bu talablar Qrim arbitraj sudi tomonidan qanoatlantirilmagan. Sud huquqbuzarlikning Rossiya hududida sodir etilganini ta’kidlagan va Jizzax akkumulyator zavodidan 257,3 mln rubl undirish haqidagi qarorni o‘z kuchida qoldirgan.

Jizzax akkumulyator zavodi haqida

“Jizzax akkumulyator zavodi” AJ 2003 yilda tashkil etilgan bo‘lib, yiliga 800 ming dona akkumulyator ishlab chiqarish quvvatiga ega.

Kompaniya rasmiy saytida ishlab chiqarilayotgan akkumulyatorlar “JAZ Battery” savdo belgisi ostida sotilayotgani keltirib o‘tilgan. Korxona o‘z mahsulotlarini Rossiya, Tojikiston, Qirg‘iziston va Afg‘onistonga eksport qiladi.

Zavod O‘zbekistondagi akkumulyatorlar bozorida ustun mavqega ega. 2018 yil iyunda korxonadagi 51,78 foiz davlat ulushini xususiylashtirish haqida prezident qarori imzolangan, lekin 2021 yil iyulida qaror bekor qilingan. Aksiyadorlik jamiyatining kuzatuv kengashiga O‘zbekiston kasaba uyushmalari federatsiyasi raisi Qudratulla Rafiqov raislik qiladi.

Ma’lumot uchun, zavod 2022 yilda 8,1 mlrd so‘m sof foyda ko‘rgan. Bu Rossiya arbitraj sudi tomonidan belgilangan jarima miqdoridan 4 barobarga kamroq.