O‘zbekistonda jazirama issiq sabab poyezdlar harakati tezligiga cheklovlar kiritiladi

Ayni kunlarda respublika hududida keskin issiq ob-havo kuzatilmoqda. Harorat ko‘tarilishi va natijada yerusti temiryo‘llari relslari hamda ularning po‘lat qismlarida harorat juda yuqori darajaga yetishi mumkin.

«O‘ztemiryo‘lyo‘lovchi» AJ matbuot xizmati xabariga ko‘ra, bunday issiq havo harorati temiryo‘l izlariga o‘z ta’sirini o‘tkazadi. Shu bois, yo‘lovchilar va poyezdlar harakat xavfsizligini ta’minlash maqsadida, poyezdlar harakat tezligiga cheklovlar o‘rnatiladi.

Qayd etilishicha, harakat tezligiga cheklovlar o‘rnatilgan poyezdlarning sovitish tizimi ishlash quvvati pasayishi mumkin.

«O‘ztemiryo‘lyo‘lovchi» mijozlardan anomal issiqlik tufayli yuzaga kelishi mumkin bo‘lgan noqulayliklar uchun uzr so‘ragan.