Birinchi L-410 samolyoti O‘zbekistonga yuborildi 

Iyun oyida O‘zbekiston milliy aviakompaniyasi Chexiya zavodi bilan ikkita Let L-410 UVP-E20 turbovintli samolyot sotib olish bo‘yicha shartnoma imzolagan edi. 

«Uzbekistan Airways» milliy aviakompaniyasi uchun mo‘ljallangan birinchi Let L-410 UVP-E20 samolyoti 13 iyul kuni Chexiyaning Kunovitse shahridan havoga ko‘tarildi. 

Rossiyaga nisbatan joriy qilingan sanksiyalar tufayli samolyot O‘zbekistonga Bolgariya (Burgas), Turkiya (Samsun), Armaniston, Ozarboyjon va Turkmaniston orqali 15 iyul kuni yetib kelishi kutilmoqda. 

LET L-410 «Turbolyot» - mahalliy aviakompaniyalar uchun mo‘ljallangan, yengil, ko‘p maqsadli ikki dvigatelli samolyot bo‘lib, 1966-1967 yillarda Chexoslovakiyaning Let Kunovice aviatsiya zavodi konstruktorlik byurosi (hozir Chexiyaning LET Aircraft Industries zavodi) tomonidan ishlab chiqilgan. 

Samolyot maxsus tayyorlanmagan, asfaltlanmagan, o‘tloqli yo‘laklarda, qorli hududlarda, shuningdek, qisqa uchish-qo‘nish yo‘laklari bo‘lgan aerodromlardan uchish uchun mo‘ljallangan. 19 yo‘lovchi yoki 1,8 tonna yukni 1500 km masofaga tashishga qodir.