«Arsenal» yangi transferini e’lon qildi

«Arsenal» «Ayaks» himoyachisi Yurriyen Timberni transfer qildi.

22 yoshli niderland «kanonirlar» bilan 5 yillik shartnomaga imzo chekdi.

U yangi jamoasida 12-raqam ostida to‘p suradi.

Avvalroq, London klubi ushbu o‘ng qanot himoyachisi uchun 40 million yevro transfer puli to‘lashi haqida xabar qilingandi.

Timber «Ayaks» akademiyasi tarbiyalanuvchisi hisoblanadi. U Amsterdam jamoasi safida 121 o‘yinda maydonga tushib, 6 gol urgan va 4 golga uzatma bergan.

Transfermarkt portali uning transfer qiymatini 42 million yevroga baholagan.

Bu «Arsenal»ning yozgi transferlardagi ikkinchi xaridi bo‘ldi. Bundan avvalroq «Chelsi»dan hujumkor yarimhimoyachi Kay Havers 71 mln yevroga sotib olingandi.

Shuningdek, «Vest Hem»dan tayanch yarimhimoyachisi Deklan Raysni transfer qilish masalasi hal bo‘lgan. Angliya milliy jamoasiga nomzod bo‘lgan ushbu futbolchi uchun London klubi kamida 105 mln funt to‘lashi xabar qilingan.