Ukraina qarshi hujumning ilk haftalarida harbiy texnikaning 20 foizini yo‘qotdi - OAV

Ukraina Qurolli kuchlari qarshi hujumning dastlabki ikki haftasida G‘arb tomonidan yetkazib berilgan tanklar va zirhli transportyorlar kabi harbiy texnikaning 20 foizini yo‘qotdi. Bu haqda New York Times yozdi.

Nashr suhbatdoshlariga ko‘ra, Ukraina Qurolli kuchlari ilk hujumdan keyin katta yo‘qotishlarga uchragan, so‘ngra vaziyatni baholash maqsadida hujumni sekinlashtirgan. Keyingi haftalarda Ukraina qo‘mondonligi taktikani o‘zgartirgan, natijada jangovar yo‘qotishlar sezilarli darajada kamaygan. Bu esa Ukraina Qurolli Kuchlariga navbatdagi zarba uchun ko‘proq qo‘shin va texnikani tejash imkonini bergan.

Hozir Ukraina Qurolli kuchlari Rossiya armiyasining orqa tarafiga raketa va artilleriya zarbalari berishga urinmoqda. Shu bilan birga, hujum sur’ati pasaygan, ba’zi hududlarda esa butunlay to‘xtagan.

Nashrning ta’kidlashicha, qarshi hujum haqida xulosa chiqarishga hali erta. NATO bosh kotibining sobiq yordamchisi Kamil Grand so‘zlariga ko‘ra, Qurolli kuchlarning yo‘qotishlari va hujumning sekinlashuvi «qarshi hujumning muvaffaqiyatsizlikka mahkum» ekanini anglatmaydi.

Ukraina prezidenti Volodimir Zelenskiy BBC News telekanaliga bergan intervyusida Qurolli kuchlarning hujumi «ko‘ngildagidan sekinroq kechayotganini» tan oldi. Sabablari haqida gapirar ekan, Zelenskiy minalangan maydonlar hujumni sekinlashtirayotganini ta’kidladi – uning so‘zlariga ko‘ra, rossiyaliklar Ukraina hududining 200 ming kvadrat kilometrga yaqin qismini minalashtirgan.

Ukraina bosh vaziri Denis Shmixal The Guardian gazetasiga bergan izohida, Qurolli kuchlar hujumga qanday tayyorgarlik ko‘rgan bo‘lsa, rossiyaliklar ham mudofaaga shunchalik hozirlik ko‘rgani, shu bois Ukraina qo‘shinlarining oldinga siljishi kutilganidan ham sekinroq ekanini aytdi. Shuningdek, u hujumning muvaffaqiyatiga shubha qilmasligini qo‘shimcha qilib, buning uchun «vaqt kerak ekanini» ta’kidladi.