Kuchli shamol Xorazm va Qoraqalpog‘istonning ayrim hududlarini elektrsiz qoldirdi 

Xorazm viloyati va Qoraqalpog‘iston Respublikasida kuzatilyotgan noqulay ob-havo (kuchli shamol) oqibatida ayrim hududlarda elektr energiyasida uzilishlar sodir bo‘lmoqda. 

Jumladan, Xorazm viloyatining Urganch, Gurlan, Shovot, Bog‘ot, Yangibozor, Qo‘shko‘pir, Xonqa tumanlarida kuchli shamol elektr simyog‘ochlarini qulatgan, uylarning tomini uchirib ketgan, daraxtlar qulab, elektr tarmoqlariga zarar yetkazgan. Oqibatda, elektr energiyasi ta’minotida uzilishlar yuz bergan. 

Qayd qilinishicha, «Hududiy elektr tarmoqlari» korxonasi brigadalari tomonidan avariya holatlarini bartaraf qilish ishlari olib borilmoqda. 

Shuningdek, Qoraqalpog‘iston Respublikasida kuchli shamol esishi oqibatida ayrim elektr uzatish tarmoqlari xavfsizlikni ta’minlash maqsadida o‘chirilgan. Shu sababli, ayrim hududlarida elektr ta’minotida uzilish kuzatilmoqda. Kuchli shamol esishi to‘xtagandan so‘ng elektr ta’minoti tiklanishi aytilmoqda.