Kun.uz’ning quruvchilar trotuarni ham egallab olayotgani haqidagi surishtiruvidan so‘ng Qurilish va uy-joy kommunal xo‘jaligi vazirligi hamda Chilonzor tumani hokimligi holatga tezkor munosabat bildirdi. Ta’kidlanishicha, qurilish kompaniyalari tomonidan qurshab olingan yo‘laklar yo‘lovchilar uchun ochilmoqda. Lekin boshqa hududlarda hali bunday holatlar ko‘p.
Saytimiz orqali respublikaning bir necha ko‘chalarida qurilish obektlari piyodalar yo‘laklarini ham o‘zboshimchalik bilan egallab olayotgan holatlar aks etgan maqolani e’lon qilgan edik. Qurilish va uy-joy kommunal xo‘jalik vazirligi tomonidan bildirilgan munosabatda haqiqatan ham maqolada ko‘rsatilgan holatlar o‘rinli ekanligi ma’lum qilingan. Vazirlikka ko‘ra, Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasi tomonidan mazkur holatlar manzillarga chiqqan holda o‘rganilib, mas’ullarga mavjud muammolarni bartaraf etish yuzasidan tushuntirish ishlari olib borilgan.
Xususan, maqolada ko‘rsatib o‘tilgan obektlar atrofi joyida tozalanib, tartibga keltirilayotganini vazirlik taqdim etgan tasvirlardan ko‘rish mumkin.
Mirobod tumani Sodiq Azimov ko‘chasidagi qurilish obektida yaqinida ham havoga chang ko‘tarilmaslik choralari ko‘rilib, asfalt yo‘lga zarar yetkazilgan joylar to‘g‘rilangan va trotuarlar piyodalar o‘tishi uchun qulay holatga keltirilgan. Shuningdek, nazorat ishlari hududlar bo‘ylab davom etishi ham ma’lum qilingan.
Endigi bosqichda ochilgan trotuarlarni shu holicha qoldirmasdan, jismoniy imkoniyati cheklangan yo‘lovchilarga ham qulaylik yaratiladi. Bu ishlar ham tez orada bajarilishiga umid qilamiz.
Ammo Qushbegi va Shota Rustaveli ko‘chalari chorrahasida bir necha yillardan beri o‘rab olingan hudud hamon piyodalar uchun ochilmadi. Holatning kechikayotgani sababini so‘rab Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasiga murojaat qildik. Inspeksiya matbuot xizmati tomonidan mazkur qurilish obekti rahbariyati ayni paytda xorijda ekanligi, ular O‘zbekistonga qaytishi bilan yaqin kunlarda muammo bartaraf qilinishi bildirildi.
Muammolar shu bilan barham bo‘lgani yo‘q. Shaharlarimizda hali ochilishi kerak bo‘lgan va o‘zboshimcha egallab olingan trotuarlar bir talay. Masalan, Chilonzor tumanining hali to‘liq ochib berilmagan Chilonzor ko‘chasida piyodalar yo‘li tadbirkorlar tomonidan egallab olinib, harakatlanish uchun juda noqulay holat yuzaga kelgan.
Shuningdek, Shayxontohur tumani Qoratosh ko‘chasi yaqinidagi yana bir yirik qurilish obekti rahbariyati ham yo‘lovchilarni trotuarlarda harakatlanish huquqidan mahrum qilgan: piyodalar oylarki ko‘chaning avtomobillar qatnov qismidan yurishga majbur bo‘lishmoqda.
Trotuarning ma’lum qismigina ochiq. U ham chiqindi tashlash qutilari bilan to‘sib qo‘yilgan. Qutilardan keyin esa obekt trotuar bilan egallab olingan.
Yo‘l juda tor, ikki taraflama avtomobillar arang harakatlanadi. Yo‘lovchilarga esa tanlov yo‘q. O‘z hayotlarini xavf ostiga qo‘yib harakatlanishga majbur.
Fuqarolarni huquqlaridan bu tarzda cheklab qo‘yayotgan tadbirkorlarning bunday e’tiborsizliklariga tegishli tashkilotlar tez orada yechim topishadi, degan umiddamiz.
Sardorbek Usmoniy
